كۆمیسیۆنی باڵای سەربەخۆی هەڵبژاردنەكانی عێراق ئەمڕۆ سێشەممە راگەیەنراوێكی لەبارەی پڕۆسەی هەڵبژاردنی پەرلەمانی كوردستان بڵاو كردەوە.
كۆمیسیۆن لە راگەیەنراوكەدا رایگەیاند: بنكە و وێستگەكانی دەنگدان بۆ هەڵبژاردنی پەرلەمانی كوردستان لە كاتژمێر حەوتی بەیانی تاكو شەشی ئێوارە كراوە دەبن.
راشیگەیاند: رۆژی هەینی رێكەوتی 18/10/2024 رۆژی دەنگدانی تایبەت دەبێت، رۆژی یەكشەممەش رێكەوتی 20/10/2024 بۆ دەنگدانی گشتی دەبێت.
هەروەها رایگەیاند: بەهیچ شێوەیەك پڕۆسەی دەنگدان درێژناكرێتەوە، لەبەر ئەوەی پڕۆسەی كردنەوە و داخستنی وێستگەكانی دەنگدان بە شێوەی ئەلیكترۆنی دەبێت.
كۆمیسیۆنی باڵای سەربەخۆی هەڵبژاردنەكانی عێراق بڵاویشی كردەوە: دووپاتی دەكەینەوە كە دەنگدان تەنیا لە رێگەی بەكارهێنانی كارتی بایۆمەتری دەنگدەر دەبێت.
جەختیشی كردەوە كە بەگوێرەی بڕیاری لیژنەی باڵای ئەمنی رێگەنادرێت بە بردنەژوورەوەی ئامێری مۆبایل و كامێرا بۆ ناو بنكە و وێستگەكانی دەنگدان، تەنیا لەو بنكانە نەبێت كە بۆ راگەیاندنكاران تەرخانكراوە.
لە كۆتاییدا كۆمیسیۆنی هەڵبژاردنەكان داوای كرد كە هەموولایەك پابەندبن بەو رێنماییانەی دەركراون.
کۆمێنت (0)
تا ئێستا هیچ کۆمێنتێک نەکراوە.