لە درێژەی كاروچالاكییە بەردەوامەكانی حكوومەتی هەرێمی كوردستان، مزگێنییەكی دیكەی بە هاووڵاتییانی شاری هەولێر دەدرێت، ئەویش ئەوەیە كە له ئاینده‌یه‌كی نزیكدا دەست بە تەواوکردنی هه‌ردوو پڕۆژه‌ی تونێلی ماوه‌ران و میراوه ده‌كرێت.
ئومێد خۆشناو پارێزگاری هەولێر بە (ماڵپەڕی كوردستان تیڤی) راگەیاند: لە كابینەی نۆیەمی حكوومه‌تی هه‌رێمی كوردستان بەشێوەیەكی گشتی گرینگییه‌كی تایبەت بە شەقام و رێگاكان دراوە بەتایبەتیش رێگاكانی دەرەوە.
راشیگەیاند: یەكێك لەو رێگایانە، رێگای سەرەكی هه‌ولێر - حاجی ئومه‌رانە و له‌و چوارچێوه‌یەشدا به‌شێكی گرینگی ڕێگاكه ده‌كه‌وێته سنووری شارۆچكەی شه‌قڵاوه، به‌تایبه‌تی هه‌ردوو تۆنێلی ماوه‌ران و میراوه.
ئاماژەی بەوەش دا: ئێستا تونێلی میراوه به ڕووی هاووڵاتییاندا كراوەتەوە و ته‌نیا كاری رووناكی ماوه، لە ئاییندەیەكی نزیكدا ئه‌وانیش ته‌واو ده‌كرێن.
هەروەها رایگەیاند: سەبارەت بە تونێلی ماوه‌ران، ئێستا كارەكان له كۆمپانیایەكی بیانی وه‌رگیراوەتەوە و دراوه‌ته كۆمپانیایه‌كی ناوخۆیی بۆ مەبەستی ته‌واوكردنی.
پارێزگاری هەولێر راشیگەیاند: له ئاینده‌یه‌كی نزیكدا کۆمپانیا ناوەخۆییەكە بۆ پڕۆژه‌ی تۆنێلی ماوه‌ران دەستبەکار دەبێت.
جەختیشی كردەوە كە لە ئاییندەیەكی نزیكدا تونێلەكە تەواو دەكرێت و بەمەش ڕێگاكه له تونێلی ماوه‌ران تا ده‌گاتە دووسایدی هه‌ریر ته‌واو ده‌كرێت، ئیتر بە تەواوەتی ئاسته‌نگەكانی هاتوچۆ له‌م رێگایە كۆتایی دێت.
کۆمێنت (0)
تا ئێستا هیچ کۆمێنتێک نەکراوە.