ڕۆژی هەینی 20ی ئەیلوولی 2024، لە بارەگای دادگه‌ی دادی نێودەوڵەتی لە (لاهای) کۆنفرانسی “ڕێگه‌ی دادپەروەری: مامەڵەکردن لەگەڵ ئاسته‌نگه‌كان و لێپرسینەوە لە تاوانەکانی داعش و ڕۆڵی هۆڵەندا)، بە بەشداری شاندێکی حکومەتی هەرێمی کوردستان بەڕێوە دەچێت.
سەبارەت بەم کۆنفرانسە د. دیندار زێباری، ڕێكخەری ڕاسپاردە نێودەوڵەتییەكان ڕایگەیاند: دوای کۆتاییهاتنی ئەرکی یونیتاد، وڵاتان ڕێکخراو و ئاژانسە نێودەوڵەتییەکان هەوڵەکانیان بەردەوامن، بۆ بە جینۆسایدناساندنی ئەو تاوانانەی کە بەسەر ئێزیدیەکان و پێکهاتەکانی ديكه هاتوون و فشار دەخەنە سەر حکومەتەکان بۆ بەردەوامبوون لە پرۆسەی لێکۆڵینەوە لە تاوانەکانی داعش و دادگاییکردنیان بە تاوانە نێودەوڵەتییەکان و قەرەبووکردنەوەی قوربانیيان، کۆنفرانسی (لاهای)یش لە چوارچێوەی ئەو هەوڵانە دێت.
ڕێکخەری ڕاسپاردە نێودەوڵەتییەکان ئەوەشی ڕاگەیاند: کۆنفرانسەکە لەلایەن تۆڕی یاسایيی ئێزیدی، بە هاوبەشی لەگەڵ دامەزراوەی فلۆچتلینگ و ڕێکخراوی یەزدا ئەنجام دەدرێت و ئێمە بە فەرمی بانگهێشت کراوین بۆ کۆنفرانسەکە و تێیدا گوتاری حکومەتی هەرێمی کوردستان پێشکەش دەکەین، هەروەها چەندین کەسایەتی و ڕێکخراوی نێودەوڵەتی بەشدار دەبن، لەوانە کاسپەر ڤێلدکامپ، وەزیری دەرەوەی هۆڵەندا، ژمارەیەک سیاسەتمەداری هۆڵەندا، نوێنەرانی ڕێکخراوە نێودەوڵەتییەکان، ئەندامانی داواکاری گشتيی ئەوروپا، پسپۆڕانی بواری هاوکاريی مافی مرۆڤ و هاوکاريی مرۆیی و یاسای تاوانکاريی نێودەوڵەتی، نوێنەرانی حکومەتی فيدڕاڵ و ژمارەیەک لە ڕزگاربووە ئێزدییەکان.
ڕێکخەری ڕاسپاردە نێودەوڵەتییەکان ئاماژەی بەوە کرد کە حکومەتی هەرێم فاکتەرێکی سەرەکییە دوای کۆتاییهاتنى ئەرکی تیمی لێکۆڵینەوەی نەتەوە یەکگرتووەکان بۆ لێپێچینەوە لە تاوانەکانی داعش (یونیتاد) و دەبێتە بەشێک لە هەوڵەکان بۆ هێنانەدیی دادپەروەری و قەرەبووکردنەوەی ئیزیدییەکان و گشت قوربانییانی دەستی داعش.
کۆمێنت (0)
تا ئێستا هیچ کۆمێنتێک نەکراوە.