ئەنجامە بەراییەكانی گەڕی دووەمی هەڵبژاردن لە فڕەنسا.. ماكڕۆن شكستی هێناوە

ئەنجامە بەراییەكانی گەڕی دووەمی هەڵبژاردنی پەرلەمانی فڕەنسا راگەیەنرا، بەگوێرەی ئەنجامەكان هاوپەیمانی چەپڕەوەكان لە پلەی یەكەمدان و هاوپەیمانییەكەی ئیمانوێل ماكڕۆن سەرۆكی فڕەنساش لە پلەی دووەمدایە.

ئەمڕۆ یەكشەممە گەڕی دووەمی هەڵبژاردنی پەرلەمانی فڕەنسا بەڕێوەچوو، هەفتەی رابردووش لە هەمان رۆژدا گەڕی یەكەمی هەڵبژاردن ئەنجامدرابوو.

رەنگە درەنگانی ئەمشەو یاخود بەرەبەیانی سبەی دووشەممە ئەنجامە كۆتاییەكانی هەڵبژاردنی فڕەنسا رابگەیەنرێ، بەڵام لە ئێستادا ئەنجامە بەراییەكان بڵاوكراونەتەوە كە بەمشێوەی خوارەوەن:-

بەرەی نیشتمانی گەڵ كە هاوپەیمانی چەپەكانە براوەی یەكەمی هەڵبژاردنن بە بەدەستهێنانی 172 بۆ 215 كورسی پەرلەمان.

هاوپەیمانی ئیمانوێل ماكڕۆنی سەرۆكی فڕەنسا، لە پلەی دووەمە بە بەدەستهێنانی 150 بۆ 180 كورسی پەرلەمان.

هاوپەیمانی ڕاستڕەوەكانیش بەگوێرەی ئەنجامە بەراییەكان لە پلەی سێیەمدان بە بەدەستهێنانی 115 بۆ 155 كورسی پەرلەمان.

پەرلەمانی فڕەنسا بەشێوەیەكی گشتی لە 577 كورسی پەرلەمان پێكدێت، هەر پارت و هاوپەیمانیەتییەك بیەوێت دەسەڵات و كورسی سەرۆكایەتی وەربگرێت، پێویستە 289 كورسی لەنێو هۆڵی پەرلەمان هەبێت.

بەم ئەنجامە بێت هیچ كام لە پارت و هاوپەیمانیەتییەكان نەیتوانیوە رێژەی پێویست بۆ پێكهێنانی حكوومەتی نوێی فڕەنسا پێكبهێنێ، بۆیە دەبێت هاوپەیمانی دیكە دروست بكرێت بۆ دروستكردنی زۆرینە و پێكهێنانی حكوومەت.

ئەنجامەكانی گەڕی یەكەمی هەڵبژاردنی پەرلەمانی فڕەنسا كە رۆژی یەكشەممەی هەفتەی رابردوو بەڕێوەچوو، بەمشێوەیە بوون: هاوپەیمانی چەپڕەوەكان 34%ی دەنگەكان، هاوپەیمانی ڕاستڕەوەكان 28.1%ی دەنگەكان، هاوپەیمانی میانڕەویش بە سەرۆكایەتی ئیمانوێل ماكڕۆن 20.3%ی دەنگەكانیان بەدەستهێنابوو.