لە داغستان بەهۆی هێرشی چەكدارەكان حاڵەتی لەناكاو راگەیەنرا

هێرشە چەكدارییەكەی سەرلەئێوارەی ئەمرۆ یەكشەممە كۆماری داغستانی ناچار كرد حاڵەتی لەناكاو رابگەیەنێ، بەگوێرەی زانیارییە سەرەتاییەكانیش لە ئەنجامی هێرشەكەدا چەند كەس و ئەفسەر و پۆلیسێك كوژراون.

ئەمڕۆ ئێوارە چەند چەكدارێك لە هەردوو شاری دێربنت و مەکاچکالا لە كۆماری داغستان هێرشیان كردە سەر چەند شوێنێك لەوانە كەنیسەیەكی یەهودییەكان، كەنیسەیەكی ئەرتۆدۆكسی مەسیحی رووسی، بنكەیەكی پۆلیس، بنكەیەكی پۆلیسی هاتوچۆ و چەند شوێنێكی تریش.

لە هێرشەكەدا شەڕ و رووبەڕووبوونەوەی راستەوخۆ لەنێوان چەكدارەكان و هێزەكانی پۆلیس و ئەمنی داغستان دروست بووە، بەگوێرەی زانیارییە میدیاییەكان، لە ئەنجامی هێرشەكەدا قەشەی كەنیسە ئەرتۆدۆكس و ئەفسەرێك و شەش پۆلیس كوژراون.

هێرشەكە سێرجی میلیكۆف سەرۆك كۆماری داغستانی ناچار كرد حاڵەتی لەناكاو رابگەیەنێ و سەرجەم ئەندامانی پۆلیس و هێزە تایبەتەكان لە هەردوو شارەكە رابسپێرێ بۆ ڕووبەڕووبوونەوەی چەكدارەكان.

تا ئێستا ناسنامەی هێرشكارەكان رانەگەیەنراوە، هێزە ئەمنییەكان لە داغستان ئاماژەیان بەوەداوە كە خەریكی ئاشكراكردنی ناسنامەی هێرشكارەكانن.