جه‌ماوه‌رێ دهۆك وسێمێلێ هێرشا پاسدارێن ئیرانێ بۆ سه‌ر هه‌ولێرێ شه‌رمزار كر

 وه‌كو هه‌لویسته‌كێ نه‌رزایبوونێ ئه‌ڤرۆ سپێدێ   رۆژا پێنچشه‌مبى  18ی كانوونا دووێ  2024 ێ ب هزاران ژ كه‌سایه‌تیێن جه‌ماوه‌رێ دهۆك و سێمێلێ، خۆپێشاندانه‌كا ئێمنانه‌ ل سه‌نته‌رێ باژێرێ دهۆكێ ئه‌نجامدا و هێرشا پاسدارێن ئیرانێ بۆ سه‌ر هه‌ولێرێ پرووته‌ستۆ و شه‌رمزار كر.
د خۆپێشاندانێ دا، ب سه‌دان  دوریشمێن نه‌رازیبوونێ هاتنه‌ بلندكرن و په‌یڤا جه‌ماوه‌رێ خرڤه‌به‌وى ژلایێ مامۆستایێ ئاینى مه‌لا "زاهد گۆهه‌رزى " ڤە ب زمانێ كوردى هاته‌ خواندن. هه‌روه‌سا "د. ره‌شید فندى" یاداشتناما نه‌رازیبوونێ ب زمانێ عه‌ربى خواند و"د. داود سلێمان " سه‌رۆكێ زانكۆیا دهۆكێ یاداشتنامه‌ ب زمانێ ئنگلیزى پێشكێشكر.
د هه‌ر سێ یاداشتامان دا، هێرشا پاسدارێن ئیرانێ و موشه‌كبارانكرنا هه‌ولێرا پایته‌خت و شه‌هیدكرنا سڤیلێن بێ گونەھ شه‌رمزاركرن و داخواز ژ جڤاكێ نیڤده‌وله‌تى و حكومه‌تا عیراقا فیدرال كرن كو ڤان تاوانا شه‌رمزاركه‌ن، و توخیبه‌كى بۆ ڤان دوژمنكاریا بۆ سه‌ر ئاخێ هه‌رێما كوردستانێ دانن و ته‌كه‌زكرن كو ئه‌ڤ كارێن ترسنوك نه‌شێن ئیرادا خه‌لكێ هه‌رێمێ بشكێنن.
پاش هه‌رسێ یاداشتنامه‌ راده‌ستى به‌رێز پارێزگارێ دهۆكێ هاتنه‌ كرن.
ژ لایێ خۆ ڤه‌، به‌رێز د.عه‌لى ته‌ته‌ر  پارێزگارێ دهۆكێ د په‌یڤه‌كێ دا دوباره‌ هێرشا پاسدارێن ئیرانێ بۆ سه‌ر پایته‌ختێ هه‌رێما كوردستانێ و شه‌هیدكرنا ئافره‌ت و زارۆك و سڤیلان شه‌رمزاركر و داخواز ژ جڤاكێ ده‌وله‌تى و حكومه‌تا عیراقا فیدرال كر كو هه‌لویستێن توند هه‌مبه‌ر ڤان كریارێن نه‌مرۆڤایه‌تى وه‌رگرن و سه‌رخۆشى گه‌هاندنه‌ قۆربانیێن هێرشێ وده‌ستخۆشى ل وان هه‌موو وه‌لات و لایه‌نان كر یێن ئه‌ڤ تاونه‌ شه‌رمزاركرین.