وەزیری دەرەوەی ئەمریكا دەگاتە رۆژهەڵاتی ناوەڕاست

ئەنتۆنی بلینكن، وەزیری دەرەوەی ئەمریكا، ئێوارەی ئەمڕۆ پێنجشەممە گەشتێكی نوێ بۆ ڕۆژهەڵاتی ناوەڕاست دەستپێدەكات كە ئیسرائیلیش لەخۆدەگرێت.
سەردانەكەی بلینكن بۆ ڕۆژهەڵاتی ناوەڕاست لەكاتێكدایە كە ترس و دڵەڕاوكێ لەسەر فراوانبوونی ئەو شەڕە زیاتر بووە كە ماوەی سێ مانگە لەنێوان ئیسرائیل و حەماس بەردەوامە.
ئاژانس فرانس پرێس لە زاری بەرپرسێكی ئەمریكییەوە بڵاویكردەوە، كە داوای كردووە ناوی ئاشكرا نەكرێت و ڕایگەیاندووە، بلینكن ئێوارەی ڕۆژی پێنجشەممە ئەمریكا بەجێدەهێڵێت و گەشتێك دەكات كە ئیسرائیلیش دەگرێتەوە.
شایانی باسە ئەمە پێنجەمین سەردانی فەرمی بلینكن دەبێت بۆ ئیسرائیل، هەروەها چوارەم سەردانی بۆ ناوچەكە دەبێت، لەو كاتەوەی شەڕ لە نێوان ئیسرائیل و حەماس لە 7ی ئۆكتۆبەر سەریهەڵدا.