ئه‌مڕۆ سێشه‌م ئه‌فسه‌رێكی كورد به پله‌ی موقه‌ده‌م له سوپای عێراق له كاتی هه‌ڵمه‌تی گه‌ڕان به‌دوای تیرۆریستانی داعشدا له گه‌یاره، بۆمبێكی چێنراو پێیدا ته‌قییه‌وه و به‌هۆیه‌وه گیانی له‌ده‌ست دا.
ئه‌فسه‌ره كورده‌كه ناوی موقه‌ده‌م (سۆران محه‌مه‌د)ـه و خه‌ڵكی شاری هه‌ولێره.
له‌مباره‌وه ئومێد خۆشناو پارێزگاری هه‌ولێر پرسه‌نامه‌یه‌كی به‌هۆی گیانله‌ده‌ستدانی موقه‌ده‌م سۆران محه‌مه‌د بڵاو كرده‌وه و تێیدا سه‌ره‌خۆشی له بنه‌ماڵه‌ی ناوبراو كرد.
له پرسه‌نامه‌كه‌دا ئومێد خۆشناو ڕایگه‌یاند "به‌دڵگرانییه‌كی زۆره‌وه هه‌واڵی شەهیدبوونى مقەدەم (سۆران محەمەد)-مان پێ گه‌یشت، کە ئەمڕۆ لە کاتی هەڵمەتی گەڕان به دوای تیرۆرستانى داعش، لە بیابانی گەیارە بۆمبێکی چێندراو تەقییەوە و بەو هۆیەوە گیانی لەدەست دا".
پارێزگاری هه‌ولێر ڕاشیگه‌یاند "پرسه و سه‌ره‌خۆشی خۆمان ئاراسته‌ی خانه‌واده و دۆست و ئاشنایانتان ده‌كه‌ين و خۆمان بە هاوبەشی خەمیان دەزانين، هه‌روه‌ها له خودای گه‌وره داواكارين گیانی خوالێخۆشبوو به‌ر ره‌حمه‌تی خۆی بخات و به به‌هه‌شتی به‌رینی شاد بكات، سەبر و ئارامی بە هەموولایەک ببەخشێت".
کۆمێنت (0)
تا ئێستا هیچ کۆمێنتێک نەکراوە.