چواره‌مین جامی سوپه‌ری ئیسپانیا له‌ 10ی كانوونی دووه‌می داهاتوو ده‌ست پێ ده‌كات

یه‌كێتی تۆپی پێی ئیسپانیا رووبه‌رووبونه‌وه‌كانی چواره‌مین جامی سوپه‌ری ئیسپانیای بۆ وه‌رزی ئه‌مساڵ بڵاوكرده‌وه،‌ كه‌ به‌هه‌مان شێوه‌ی وه‌رزی رابردوو له‌وڵاتی سعودیه‌ به‌رێوه‌ده‌چێـت.
 یارییه‌كانی جامی سوپه‌ر رۆژی ده‌ی كانوونی دووه‌می داهاتوو ده‌ست پێ ده‌كات و رۆژی چوارده‌ی كانوونی دووه‌م یاری كۆتایی به‌رێوه‌ده‌چێت.
 بۆ وه‌رزی ئه‌مساڵ یانه‌ی بارسێڵۆنای پاڵه‌وانی لالیگا و ریال مه‌دریدی پاڵه‌وانی جامی شا و ئه‌تله‌تیكۆ مه‌دریدی خاوه‌ن پله‌ی سێیه‌می لالیگا و ئۆساسۆنای خاوه‌ن پله‌ی دووه‌می جامی شا كێبركێی نازناوی جامی سوپه‌ری ئیسپانیا ده‌كه‌ن.
 له‌یه‌كه‌م یاریدا له‌قۆناغی پێش كۆتایی یاری دێربی مه‌درید له‌نێوان هه‌ردوو یانه‌ی ریاڵ مه‌درید و ئه‌تله‌تیكۆ مه‌درید له‌رۆژی ده‌ی كانوونی دووه‌م به‌رێوه‌ده‌چێت.
 دواتر هه‌ردوو یانه‌ی بارسێلۆنا و ئۆساسۆنا له‌رۆژی یازده‌ی كانوونی دووه‌م رووبه‌رووی یه‌كتر ده‌بنه‌وه‌، براوه‌ی هه‌ردوو یاری رۆژی چوارده‌ی كانوونی دووه‌م یاری كۆتایی ئه‌نجام ده‌ده‌ن، جێی ئاماژه‌یه‌ سه‌رجه‌م یارییه‌كان له‌سه‌ر یاریگای یانه‌ی نه‌سر له‌شاری جه‌ده‌ی سعودیه‌ ئه‌نجام ده‌درێت.