سه‌رۆكى هه‌رێمى كوردستان له‌گه‌ڵ باڵيۆزى به‌لژيكا كۆبووه‌وه.
نيوه‌ڕۆى ئه‌مڕۆ چوارشه‌ممه 2023/10/18 نێچيرڤان بارزانى، سه‌رۆكى هه‌رێمى كوردستان، پێشوازى له‌سێرج ديكشن باڵيۆزى به‌لژيكا له عێراق و ئوردن كرد.
له كۆبوونه‌وه‌يه‌كدا په‌يوه‌ندييه‌كانى به‌لژيكا له‌گه‌ڵ عێراق و هه‌رێمى كوردستان، په‌يوه‌ندييه‌كانى هه‌ولێر به‌غدا و گفتوگۆى چاره‌سه‌ركردنى كێشه‌كانيان، گرنگيى شياندنه‌وه‌ى ڕفێنراوانى ئێزديى ڕزگاربووى ده‌ستى داعش، دۆخى سياسيى عێراق و هه‌ڵبژاردنه‌كانى عێراق و هه‌رێمى كوردستانيان، تاوتوێ كران.
نێچيرڤان بارزانى سوپاس و پێزانينى هه‌رێمى كوردستانى بۆ به‌شداريى به‌لژيكا له هاوپه‌يمانيى نێوده‌وڵه‌تيى دژى داعش و هاوكارييه‌كانى بۆ عێراق و هه‌رێمى كوردستان ده‌ربڕى، هه‌روه‌ها هه‌ردوولا خواستى دوولايه‌نه‌يان بۆ بره‌ودان به په‌يوه‌ندييه‌كان و فراوانكردنى هاريكاريى هاوبه‌شى نێوانیان له هه‌موو بواره‌كاندا دووپات كرده‌وه.
هه‌ردوولا هاوڕا بوون له‌سه‌ر گرنگيى جێبه‌جێكردنى دروستى سيسته‌مى فيدراڵى له عێراق و كارى پێكه‌وه‌يى بۆ پاراستنى ئارامى و سه‌قامگيرى له عێراق و ناوچه‌كه، هه‌روه‌ها به‌ڕێز باڵيۆزى به‌لژيكا سوپاس و پێزانينى وڵاته‌كه‌ى بۆ ڕۆڵى هه‌رێمى كوردستان له تێكشكاندنى داعش و به‌ره‌نگاربوونه‌وه‌ى تيرۆر دووپات كرده‌وه.
له ته‌وه‌رێكى ديكه‌ى كۆبوونه‌وه‌كه‌دا ده‌رباره‌ى دوايين پێشهاته‌كانى ناوچه‌كه به‌گشتى، بيرورايان گۆڕييه‌وه.
کۆمێنت (0)
تا ئێستا هیچ کۆمێنتێک نەکراوە.