ئەمڕۆ بڕیار لەسەر ناردنی پارە بۆ مووچەخۆرانی هەرێمی كوردستان دەدرێت

ئەنجومەنی وەزیرانی عێراق كۆدەبێتەوە و بڕیار لەسەر پێشنیازی حكومەتی هەرێمی كوردستان سەبارەت بە ناردنی پارە بۆ مووچەخۆرانی هەرێمی كوردستان دەدات.
وابڕیارە ئەمڕۆ یەكشەممە 17/9/2023، ئەنجومەنی وەزیرانی عێراق بە سەرۆكایەتی محەممەد شیاع سوودانی ،سەرۆك وەزیرانی عێراق كۆببێتەوە و بڕیار لەسەر پێشنیازی حكومەتی هەرێمی كوردستان سەبارەت بە ناردنی پارە بۆ مووچەخۆرانی هەرێمی كوردستان بدات.
شاندی باڵای حكومەتی هەرێمی كوردستان،لەمیانەی سەردانەكەیدا بۆ بەغدا پێشنیازی كردووە بۆ مانگەكانی (7 تا 12ـی ئەمساڵ) حكومەتی عێراق مانگانە بڕی 800 ملیار دینار بۆ دابینكردنی مووچەی مووچەخۆرانی هەرێمی كوردستان رەوانە بكات.
شایانی باسە ئەنجومەنی وەزیرانی عێراق ،هەفتانە لە رۆژی سێشەممەدا كۆدەبێتەوە،بەڵام كۆبوونەوەكە بۆ ئەمڕۆ یەكشەممە پێشخراوە.