ئه‌نجامی چه‌ند یارییه‌ك له‌ خوله‌ ناوخۆییه‌كانی ئه‌وروپا

رۆژی هه‌ینی 18ی8ی2023، چه‌ند یارییه‌ك له‌ خوله‌ ناوخۆییه‌كانی ئه‌وروپا به‌رێوه‌چوو. 
له‌ گه‌ڕی یه‌كه‌می خولی پله‌یه‌كی ئه‌ڵمانیا، یانه‌ی بایرن میونشن پاڵه‌وانی یازده‌ وه‌رزی رابردووی خولی بۆندس لیگای ئه‌لمانی و خاوه‌نی 33 نازناوی خوله‌كه‌، له‌ده‌ست پێكی یارییه‌كانی وه‌رزی نوێی خوله‌كه‌ له‌ ده‌ره‌وه‌ی یاریگای خۆی به‌ چوار گۆلی بێ به‌رامبه‌ر له‌ یانه‌ی ڤێرده‌ربرێمنی میوانداری برده‌وه‌ .
یارییه‌كه‌ له‌ برێمن و له‌سه‌ر یاریگای ڤیسێر ستادیۆم به‌رێوه‌ چوو ، له‌ گێم یه‌كه‌م میوانه‌كان به‌ گۆلێك پێشكه‌وتن گۆله‌كه‌ش لیرۆی سانی له‌ خوله‌كی چوار تۆماری كرد ، له‌ خوله‌كی 74 هاری كینی تازه‌ یاریزانی باڤاری یه‌كه‌م گۆلی خۆی به‌ درێسی یانه‌كه‌ی تۆمار كرد.
له‌ خوله‌كی 90 لیرۆی سانی گۆلی دووه‌می خۆی و سێیه‌می یانه‌كه‌ی تۆمار كرد ، له‌ كاتی زیاكراویشدا ماتیس تێل گۆلی چواره‌می تۆمار كردو بایرن میونشن به‌سه‌ره‌تایه‌كی به‌هێز ده‌ستی به‌ ركابه‌رییه‌كانی ئه‌م وه‌رزه‌ی خولی بۆندس لیگای ئه‌لمانی كردو یه‌كه‌م سێ خاڵی به‌ده‌ستهێنا .
   

له‌یاریه‌كی دیكه‌ی گه‌ری دووه‌می خولی یانه‌كانی ئیسپانیا، یانه‌ی ڤالنسیا میوانداری یانه‌ی لاس پاڵماسی كردوو دووه‌م بردنه‌وه‌ی له‌ خوله‌كه‌ نوسیه‌وه‌ .
 یاریه‌كه‌ له‌سه‌ر یاریگای مێستایا له‌ مه‌درید به‌رێوه‌ چوو ،له‌ گێمی یه‌كه‌م هیچ گۆلێك تۆمار نه‌كرا ، له‌ گێمی دووه‌م و له‌ خوله‌كی 74 ناوبژیوان لێدانێكی سزای بۆ خاوه‌ن یاریگا هه‌ژمار كردو یاریزانی ئیسپانی بیبیلۆ به‌ سه‌ركه‌وتوویی جێبه‌جێی كردو تاكه‌ گۆلی یاریه‌كه‌ی تۆمار كردو ئه‌م گۆله‌ش به‌س بوو تاوه‌كو ڤالنسیا سه‌ركه‌وتن و سێ خاڵی یاریه‌كه‌ ده‌سته‌به‌ر بكات .
به‌مه‌ش ڤالنسیا بووه‌ خاوه‌نی شه‌ش خال و له‌ پله‌ی یه‌كه‌می ریزبه‌ندی لالیگا دێت ، لاس پاڵماسیش تووشی یه‌كه‌م دۆراندن هات و تاكه‌ خالێكی هه‌یه‌ .

 
له‌ میانی هه‌فته‌ی دووه‌می خولی یانه‌كانی ئینگلته‌را یانه‌ی نۆتینگهام فۆرێست میوانداری یانه‌ی شیفڵد یونایتدی كردو یاریه‌كه‌شی لێ برده‌وه‌ به‌ئه‌نجامی دوو گۆل به‌رامبه‌ر به‌ گۆلێك.
 یاریه‌كه‌ له‌سه‌ر یاریگای ستی گراوند به‌رێوه‌ چوو ، له‌گه‌ل ده‌ستپێكی یاری و له‌ خوله‌كی سێ تایۆ ئۆمبی گۆلێكی بۆ خاوه‌ن یاریگا تۆمار كردو نۆتینگهای له‌ گێمی یه‌كه‌م به‌م گۆله‌ پێشخست ، سێ خوله‌ك دوای ده‌ست پێكردنه‌وه‌ی گێمی دووه‌م گۆستاڤۆ هامه‌ر گۆلی یه‌كسان بوونه‌وه‌ی بۆ شیفلد یونایتد تۆمار كردو یاریه‌كه‌شی گه‌رانده‌وه‌ خالی سه‌ره‌تا .
 له‌ خوله‌كی 89 یه‌ك خوله‌ك به‌ر له‌ ته‌واو بوونی ماوه‌ی یاری كریس وۆد گۆلی دووه‌م و بردنه‌وه‌ بۆ خاوه‌ن یاریگا تۆمار كردو نۆتینگهام فۆرێست یه‌كه‌م بردنه‌وه‌ی له‌ خوله‌كه‌ به‌ده‌ستهێناو بووه‌ خاوه‌نی یه‌كه‌م خالی پرێمه‌ر لیگ .
  

له‌ ده‌ست پێكی یاریه‌كانی هه‌قته‌ی دووه‌می خولی یانه‌كانی فه‌ره‌نسا یانه‌ی مارسیلیا زۆر به‌ زه‌حمه‌ت توانی له‌گه‌ل یانه‌ی مێتز یه‌كسان بێ و خالێك له‌ ده‌ره‌وه‌ی یاریگای خۆی به‌ده‌ست بێنێت .
 یانه‌ی مێتز له‌سه‌ر یاریگای سان سامڤۆریان میوانداری یانه‌ی مارسیلیای كردو هه‌ردوو یانه‌ش به‌ تۆمار كردنی دوو گۆل یه‌كسان بوون ، له‌ خوله‌كی 14 عیمران سۆگلۆ  گۆلێكی بۆ میوانه‌كان تۆمار كردو یانه‌ی مارسیلیای له‌ گێمی یه‌كه‌م پێشخست .
 له‌ خوله‌كی 59 ئه‌بوبه‌كر لۆ یاریزانی مێتز به‌ كارتی سوور كرایه‌ ده‌ره‌وه‌ی یاریگاو به‌هۆیه‌وه‌ میوانداره‌كان یاریه‌كه‌یان به‌ ده‌ یاریزان ته‌واو كرد ، له‌ خوله‌كی 65 شێخ سابالی گۆلی یه‌كسان بوونه‌وه‌ی بۆ مێتز تۆماركرد ، شه‌ش خوله‌ك دواتر جۆرج میكۆتادۆرس گۆلی دووم و پێشكه‌وتنی بۆ خاوه‌ن یاریگا تۆمار كرد .
 له‌ خوله‌كی 82 ڤیتینیا گۆلی دووه‌می بۆ مارسیلیا تۆمار كردو ئه‌نجامی یاریه‌كه‌ی یه‌كسان كرده‌وه‌ ، به‌م ئه‌نجامه‌ش مارسیلیا بووه‌ خاوه‌نی چوار خال و یانه‌ی مێتز دوای دۆرانی له‌ یاری رابردوو یه‌كه‌م خالی له‌ خوله‌كه‌ به‌ده‌ستهێنا .