کابینەی نۆیەم، ژێرخانێکی بەهێزی ئابووری بۆ هەرێمی کوردستان بوونیاد دەنێت، چۆن؟

گرنگترین پڕۆژەی ستراتیژیی حکومەتی هه‌رێم لە ئیدارەی ڕاپەڕین جێبەجێ دەکرێت.
هەوڵەکانی کابینەی نۆیەمی حکومەتی هەرێمی کوردستان، بۆ بونیاتنانی ژێرخانێکی بەهێزیی ئابووری بۆ هەرێمی کوردستان بەردەوامن و لەو چوارچێوەیەشدا، پرۆژەی پردی دەربەندی ڕانیە، لە مانگی 10ـی ئەمساڵ، بە گوژمەی زیاتر لە12 ملیار دینار تەواو دەکرێت و دەخرێتە خزمەت شۆفێران و هاووڵاتییانەوە.
پرۆژەی پردی دەربەندی ڕانیە، کە ئیدارەی ڕاپەڕین بە پارێزگای سلێمانی دەبەستێتەوە، دەبێتە درێژترین پردی ناوچەکە و کارکردن بۆ تەواوکردنی پڕۆژەکە بەردەوامە، سەبارەت بە کارکردن و ماوەی تەواوبوونی پڕۆژەکە، وەزیری ئاوەدانکردنەوە و نیشتەجێکردن دەڵێت: "ئەگەر گرفتی دارایی دروست نەبێت، لە مانگی 10ـی ئەمساڵ، پرۆژەکە تەواو دەکرێت و دەخرێتە خزمەت شۆفێران و هاووڵاتییانەوە".
لەبارەی گرنگیی پرۆژەکەشەوە، هیوا عەبدوڵڵا، ئەندازیاری پرۆژەکە بە فەرمانگەی میدیا و زانیاری گوت: "پرۆژەکە، یەکێکە لە پرۆژە بەردەوام و ستراتیژییەکانی حکومەت لە سنووری ئیدارەی ڕاپەڕین، ئەویش یەکەمجارە پرۆژەیەکی لەم شێوەیە لە ناوچەکە جێبەجێ دەکرێت".
تاوەکوو ئێستا 67٪ـی پرۆژەی پردی دەربەندی ڕانیە تەواو بووە و کارکردنیش بۆ تەواوکردنی پرۆژەکە لەکاتی خۆیدا، بەردەوامە.
هیمداد ئەحمەد، سەرپەرشتیاری پرۆژەکە، لەبارەی پێکهاتەی پردەکەوە گوتی: "درێژیی پردەکە 408 مەترە و بەرزییەکەشی 21 مەترە. لە دوو ئاراستەی چوون و هاتن پێک هاتووە، پانیی هەر ئاراستەیەک5 مەتر و نیوە، ئەمە جگە لەوەی پایەڵەکانی پردەکە 12 مەتر لەژێر زەوییەوەن".
گوژمەی دروستکردنی پردی دەربەندی ڕانیە، 12 ملیار و 416 ملیۆن دینارە و پێشتر لەلایەن مەسرور بارزانی، سەرۆکوەزیرانی هەرێمی کوردستان، بەردی بناغەکەی دانراوە.