سه‌رۆكی ئه‌نجوومه‌نی یه‌كێتیی ئه‌ورووپا، چارلز میشێل ئاشكرایكرد، ئه‌و هاوكارییه سه‌ربازییه‌ی له چه‌ك و ته‌قه‌مه‌نی و سووته‌مه‌نی كه به‌هۆی هێرشی رووسیاوه بۆ سوپای ئۆكراینا نێردراوه، له‌رێگه‌یه.
چارلز میشێل راگه‌یه‌ندراوێكی له‌باره‌ی ئه‌و هاوكارییانه‌ی بۆ ئۆكراینا ده‌نێردرێن بڵاو كرده‌وه و په‌یامێكی ئاڕاسته‌ی گه‌لی ئۆكراینا كرد.
میشێل رایگه‌یاند: "ئه‌مه جه‌نگی كرملین و پوتینه. جه‌نگی گه‌لی رووسیا نییه" و جه‌ختی له‌وه كرده‌وه، ئۆكراینییه‌كان به‌رگریی له وڵاته‌كه‌یان، ئازادییان و دیموكراسییان ده‌كه‌ن.
سه‌رۆكی ئه‌نجوومه‌نی یه‌كێتیی ئه‌ورووپا باسی له‌وه‌شكرد كه ئه‌مه هاوكات به‌رگرییكردنه له دیموكراسیی و ئازادیی ئه‌ورووپا، هه‌روه‌ها رایگه‌یاند: ئێوه وه‌ك ئۆكراینییه‌كان به‌رگریی له‌مانه ده‌كه‌ن. هه‌ربۆیه ئێمه له‌نێو یه‌كێتیی ئه‌ورووپادا، به به‌هێزی دژی ئه‌م هه‌ڕه‌شه مێژووییه ده‌وه‌ستینه‌وه. ته‌نها به قسه نا، به‌ڵكو به كرده‌وه‌ی به‌په‌له و به‌رجه‌سته، پشتیوانتانین. به‌مه‌به‌ستی پشتیوانییكردن له ئێوه و وڵاته‌كه‌تان، هاوپه‌یمانییه‌كه‌ی دیكەی دژبە شه‌ڕمان له‌گه‌ڵ هاوبه‌شانمان پێكهێناوه. تا دێت سه‌ركرده‌ی زیاتری وڵاتان ده‌نگیان له‌پێناو پارێزگارییكردن له یاسا نێوده‌وڵه‌تییه‌كان، به‌رز ده‌كه‌نه‌وه. ئه‌وه رێكده‌خه‌ین كه كه‌لوپه‌ل و پێداویستیی سه‌ربازیی به‌مه‌به‌ستی به‌رگریی به‌په‌له راده‌ست بكرێت. چه‌ك، ته‌قه‌مه‌نی، مووشه‌ك و سووته‌مه‌نی له رێگه‌یه بۆ ئۆكراینا.
چارلز میشێل هاوكات باسی له‌وه كرد، برێكی زۆر له هاوكاریی مرۆیی ره‌وانه‌ی ئۆكراینا ده‌كرێت.
کۆمێنت (0)
تا ئێستا هیچ کۆمێنتێک نەکراوە.