ئێوارەی دوێنێ شەممە، چواری کانوونی دووەم، بە ئامادەبوونی ژمارەیەکی زۆر لە وەرزشدۆستان و ھاندەران لە یاریگای نێودەوڵەتیی شەھید فرانسۆ ھەریری یاریی نێوان یانەی ھەولێر و یانەی شورتە لە خولی جامی عێراق ئەنجامدرا.
دوای یارییەکی بەھێز لەنێوان ھەردوو یانەدا، یانەی ھەولێر توانی بگاتە قۆناغی ھەشت دوای بردنەوەی لە شورتە بەلێدانی یەکلاکەرەوە بە 2 - 4.
لەگەڵ نزیکبوونەوەی چرکەساتەکانی کۆتایی، تێکھەڵچوون لەنێوان ھاندەرانی ھەردوو یانە رووی دا و چەند کەسێک بە سووکی برینداربوون.
دوای رووداوەکە بەشێک لە میدیا عەرەبییەکان بڵاویان کردەوە کە تێکھەڵچوونەکە لەسەر ھەڵکردنی ئاڵای عێراق بووە و کەسێکیش گیانی لەدەستداوە.
بەڵام ئەمڕۆ پارێزگاری ھەولێر، ئومێد خۆشناو ھەواڵەکەی رەت کردەوە و رایگەیاند کە ئەو بۆخۆی لەوێ بووە و سەرەتا ھاندەرانی ھەردوولا قسەیان بەیەکتر گوتووە و دواتر چەند کەسێک لە ھاندەرانی یانەی شوڕتە ژمارەیەک کورسی نێو یاریگایان شکاندووە و لە ھاندەرانی ھەولێریان گرتووە و بەمەش گرژی و تێکھەڵچوون دروست بووە و دواتر گرژییەکە کۆنتڕۆڵ کراوە.
ئومێد خۆشناو لەبارەی رووداوەکەوە گوتی: رووداوەکەی دوێنێی یاریگای شەھید فرانسۆ ھەریری کە لە ساتەکانی دوایی دابوو کە یارییەکە لەنێوان یانەی شوڕتە و یانەی ھەولێر بوو، چەند رووداوێک ھەبوو ئەویش لە ئەنجامی ئەوەی کە ھاندەرانی ھەردوولا قسەیان بەیەکتر گوت، دواتر چەند کەسێک لە ھاندەرانی یانەی شوڕتە چەند کورسییەکیان شکاند و لە ھاندەرانی یانەی ھەولێریان دەگرت.
ئومێد خۆشناو گوتیشی: ئێمە رەتی ئەوە دەکەینەوە کە نە ھیچ کەسێک سووکایەتی پێکرابێت، ھیچ کەسێک دەستی بۆ ئاڵای عێراقی و کوردستانی نەبردووە، چونکە بینیمان لە بەشێک لە دەزگا راگەیاندنەکان باس لەوە دەکرا کە ئەو تێکھەڵچوونە لەسەر ئاڵا بووە، بەڵام لە راستیدا ھیچ شتێکی وا نەبووە، بەڵکو لەسەر کێبڕکێی یارییەکە بووە و لە ھەموو دونیاش ئەوە شتێکی ئاساییە، بەڵام بابەتەکە ھیچ پەیوەندی بە ئاڵا و سیاسەت و شارەوە نەبووە و لە چوارچێوەی ئەنجامی یارییەکە ئەم تێکھەڵچوونە روویداوە.
پارێزگاری ھەولێر ئەوەیش دەخستەڕوو کە دەستەی کارگێڕیی یانەی شوڕتە بە رێزەوە تا فڕۆکەخانە بەڕێکراون و گوتی: دەستەی کارگێڕیی ھەردوولا لێرە بوونە و دواتریش دەستەی یانەی ھەولێر تا فڕۆکەخانەش لەگەڵ دەستەی یانەی کارگێڕیی شوڕتە بوونە و بە رێزەوە بەڕێکراون و بەداخەوە کەناڵەکان بابەتەکان بەلاڕێدا دەبەن و رەنگە لە ئەنجامی وەشاندنی بوتڵی ئاو کەسێک برینداربووبێت، بەڵام بە دڵنیایییەوە ھیچ کەسێک گیانی لەدەست نەداوە.
ئومێد خۆشناو: بە دڵنیایییەوە ھیچ کەسێک له یارییهکهی ههولێر و شوڕته گیانی لەدەست نەداوە
ڕەتی دەکەینەوە کە ھیچ کەسێک سووکایەتی پێکرابێت
100%
کۆمێنت (0)
تا ئێستا هیچ کۆمێنتێک نەکراوە.