ئه‌مڕۆ یه‌كشه‌م له شاری هه‌ولێر به ئاماده‌بوونی پارێزگاری هه‌ولێر و ژماره‌یه‌ك به‌رپرسی حكوومه‌ت و حیزبی و به‌رپرسانی ژماره‌یه‌ك له رێكخراو و كۆمه‌ڵگای مه‌ده‌نی و چاڵاكوانان، كۆنفرانسی كار.. هێزی مانه‌وه‌ی گه‌نجان به‌ڕێوه‌چوو.
كۆنفرانسه‌كه له‌لایه‌ن تۆڕی هه‌ماهه‌نگی ڕكخراوه‌كان CNO له شاری هه‌ولێر ڕێكخراوه و ناوی لێنراوه كۆنفرانسی (كار.. هێزی مانه‌وه‌ی گه‌نجان).
له ده‌ستپێكی ڕێوڕه‌سمه‌كه‌دا ئومێد خۆشناو پارێزگاری هه‌ولێر له وتارێكدا ده‌ستخۆشی له به‌رپرسانی تۆڕی هه‌ماهه‌نگی ڕكخراوه‌كان CNO به ئه‌نجامدانی كۆنفرانسه‌كه و هیوای سه‌ركه‌وتنیشی بۆ خواستن.
پارێزگاری هه‌ولێر هه‌روه‌ها تیشكى خسته سه‌ر هێز و توانا و ڕۆڵى گه‌نجان له كۆمه‌ڵگادا و دڵنیایی به هه‌موو ڕیكخراوه‌كانى گه‌نجان و لاوان و قوتابیان و ڕێكخراوه‌كانى ترى كۆمه‌ڵگه‌ى مه‌ده‌نی دا وه‌كو پارێزگاى هه‌ولێر پشتیوانى كاره‌كانیان بكه‌ن.
ئومێد خۆشناو ڕایگه‌یاند: هه‌روه‌ك چۆن هه‌ولێرى پايته‌خت له زۆر بواردا پێشه‌نگ بووه، به هه‌مانشێوه‌یه له كارى ڕێكخراوه‌یى و زه‌مینه‌سازى بۆ ڕۆڵبینینى لاوان و ده‌رفه‌ت ڕه‌خساندن بۆ گه‌نجان شاره‌كه‌مان به‌و پێشه‌نگیيه‌ى خۆى ده‌مێنێته‌وه.
تۆڕی هه‌ماهه‌نگی ڕكخراوه‌كان CNO پێشتر ڕایانگه‌یاندبوو: پڕۆژه‌كه تایبه‌ته به گه‌نجان و ئامانج لێی ره‌خساندنی ده‌رفه‌تی كاره له كه‌رتی تایبه‌ت و وه‌رگرتنی قه‌رزی بچووك و پیشاندانی توانای ئه‌و كه‌سانه‌ی خاوه‌ن به‌هره و پڕۆژه‌ی تایبه‌تی خۆیانن، بۆ ئه‌وه‌ی ببێته هاندانێك بۆ هه‌موو توێژی گه‌نجان.
هه‌ر له درێژه‌ی كۆنفرانسه‌كه‌دا چه‌ند پانێلك به‌ڕێوه‌چوون و تێیدا ڕۆلی گه‌نجان له‌نێو كۆمه‌ڵگه‌ی كوردستان باسكرا له‌گه‌ڵ ڕه‌خساندنی ده‌رفه‌ت و زه‌مینه‌سازی بۆ ئه‌م توێژه گرنگه‌ی كۆمه‌ڵگه تا به‌هره‌كانیان بخه‌نه‌ڕوو له‌پێناو پێشخستنی هه‌رێمی كوردستان له‌سه‌رجه‌م بواره‌كاندا.
کۆمێنت (0)
تا ئێستا هیچ کۆمێنتێک نەکراوە.