ته‌ندروستی جیهانی: ڤایرۆسی گۆڕدراوی دێلتا دواهه‌مین نابێت

د.ماریا ڤان كیرخۆف، پسپۆڕی په‌تاكان له‌ڕێكخراوی ته‌ندروستی جیهانی له‌تۆڕی تویته‌ر بڵاویكرده‌وه‌: زانایان و پسپۆڕان هه‌وڵی تێگه‌یشتنی باشترده‌ده‌ن له‌توانای خێرای گۆڕدراوی دێلتا بۆ بڵاوبوونه‌وه‌.

هه‌روه‌ها ده‌ڵێت: به‌پێی ئه‌و زانیارییانه‌ی له‌به‌رده‌ستدایه‌ ئه‌و گۆڕدراوه‌ به‌ئاسانی به‌خانه‌كانی له‌ش ده‌لكێت و به‌سه‌ر كۆئه‌ندامی به‌رگری سه‌رده‌كه‌وێت و به‌و هۆیه‌وه‌ زیاتر بڵاوده‌بێته‌وه‌.

پسپۆڕی په‌تاكان له‌ڕێكخراوی ته‌ندروستی جیهانی ڕوونیكرۆته‌وه‌ كه‌ له‌ئێستادا ڤایرۆسی كۆرۆنا به‌رده‌وامه‌ له‌گۆڕانكاریی و پێده‌چێت گۆڕدراوی دیكه‌ بێته‌ئاراوه‌ و وا بكات تووشبوون سه‌ختربكات ، هه‌ربۆیه‌ گۆڕدراوی دێلتا دواهه‌مین نابێت و پابه‌ندبوون به‌رێكاره‌ خۆپارێزییه‌كان و وه‌رگرتنی ڤاكسین بنه‌مای شكستهێنانه‌ به‌ڤایرۆسی كۆرۆنا.

د.ماریا ڤان كیرخۆف گوتیشی: ڤاكسینه‌كان ئه‌نجامیان به‌ده‌ستهێناوه‌ دژی گۆڕدراوی دێلتا به‌تایبه‌ت له‌ڕووی نیشانه‌ی توند و گیان له‌ده‌ستدان و باشترین ڕێگا بۆ به‌ره‌نگاربوونه‌وه‌ی كۆرۆنا بریتیه‌ له‌گه‌مارۆدانی و رێگرتن له‌بڵاوبوونه‌وه‌ی به‌پله‌ی یه‌كه‌م.

ژێده‌ر- ته‌ندروستی سلێمانی