فراکسیۆنی پارتی: گەلی سەربەرزی کوردستان بە هەموو ئاین و پێکهاتەکانیەوە نەکەوت و بە خۆڕاگری مایەوە

له‌ یادی حه‌وته‌م ساڵه‌ی هێرشی تیرۆرستانی داعش بۆ سه‌ر شنگال ، فراكسیۆنی پارتی دیموكراتی كوردستان له‌ په‌رله‌مانی كوردستان راگه‌یاندراوێكی بڵاوكرده‌وه‌ و رایده‌گه‌ێنێت: 
لە یادی حەوتەم ساڵەی هێرشی تیرۆریستانی داعش بۆ سەر شنگال و بە تایبەت کوردانی ئێزدی، سەرکۆنەی هەموو ئەو پەلامار و پیلانگێڕیانە دەکەین، کە ئامانج لێیان لەناوبردن و کۆمەڵکوژیی گەلی کوردستانە.
فراكسیۆنی پارتی راشیده‌گه‌ێنێت: هێرشەکەی تیرۆریستانی داعش بۆ سەر کوردانی ئێزدی بەشێک بوو لە شاڵاوە دڕندانەکانی دوژمنان بۆ سەر گەلەکەمان، کە خۆشبەختانە گەلی سەربەرزی کوردستان بە هەموو ئاین و پێکهاتەکانیەوە، نەکەوت و بە خۆڕاگری مایەوە.
هه‌روه‌ها راشیده‌گه‌یه‌نن: فراکسیۆنی پارتی بە رێز و شکۆوە یادی قوربانییانی کومەڵکوژیی شنگال دەکاتەوە و پشتیوانیی هەوڵەکانی حکوومەتی هەرێمی کوردستانیش دەکات بۆ گەڕاندنەوەی شکۆمەندانەی ئاوارە کوردە ئێزدییەکان بۆ سەر ماڵ و حاڵی خۆیان و ناساندنی ئەو تاوانانە بە جینۆساید لەسەر ئاستی نێودەوڵەتی.
له‌ به‌شێكی دیكه‌ی راگه‌یاندراوه‌كه‌ی فراكسیۆنی پارتیدا هاتووه‌: بەداخەوە دوای تێپەڕبوونی نزیکەی حەوت ساڵ بەسەر رزگارکردنەوەی شنگال لەلایەن هێزەکانی پێشمەرگەی کوردستانەوە، ئێستا کۆمەڵێک گرووپی چەکداری دەستیان بەسەر ئەو شارەدا گرتووە و رێگری لە ئاودانکردنەوەی شارەکە و گەڕانەوەی ئاوارەکان دەکەن.
 له‌ كۆتاییدا فراكسیۆنی پارتی دیموكراتی كوردستان، له‌ په‌رله‌مانی كوردستان رایده‌گه‌ێنێت: داوا لە حکوومەتی هەرێمی کوردستان دەکەین  بە هاوکاریی حکوومەتی عێراق و هەماهەنگیی کۆمەڵگەی نێودەوڵەتی هەوڵی زیاتر بدات بۆ ئاوەدانکردنەوەی شنگال.
لێرەوە سڵاوو درود بۆ گیانی ئەوانە دەنێرین لەم شاڵاوە نامرۆڤانەیە بوونە قوربانی.