کۆمسیۆن بە رێگەی ئەلیکترۆنی تیروپشک بۆ لیستی کاندیدەکان ده‌کات

كۆمسیۆنی هەڵبژاردنەکانی عێراق وادەی ئەنجامدانی تیروپشک بۆ پێدانی ژمارە بە کاندیدانی هەڵبژاردنە پێشوەختەکەی عێراق ئاشکرادەکات.

بەپێی نوسراوێکی كۆمسیۆنی باڵای سەربەخۆی ھەڵبژاردنەكانی عێراق رۆژی (5/7/2021) بە رێگەی ئەلیكترۆنی تیروپشك بۆ لیستی كاندیدەكان دەكرێت.

بەپێی رێكارەكانی كۆمسیۆنی هەڵبژاردنەکانی عێراق، پێدانی لیست بە كاندیدەكان ھاوشێوەی ھەڵبژاردنەكانی پێشوو نابێت، ھەر كاندیدە و بەپێی تیروپشكەكە كام ژمارەی بۆ دەربچێت ئەوەی دەدرێتە كاندیدەكە و حزبەكان ناتوانن لیست دیاری بكەن.

تیرووپشکەکە بە ئامادەبوونی نوێنەری لایەنە سیاسییەكان، كاندیدەكان، رێكخراوەكان و نوێنەری نەتەوە یەكگرتووەكان به‌رێوه‌ده‌چێت.

به‌پێی بڕیاری كۆمسیۆنی هه‌ڵبژاردنه‌كانی عێراق بڕیاره‌ هه‌ڵبژاردنی پێشوه‌خته‌ی ئه‌نجومه‌نی نوێنه‌رانی عێراق له‌ 10ی ئۆكتۆبه‌ری ئه‌مساڵ 2021 به‌رێوه‌بچێت، پێشتریش كۆمسیۆن رایگه‌یاندبوو: 25 ملیۆن و 139 ھەزار و 375 دەنگدەر مافی بەشدارییکردنیان لە ھەڵبژاردنی پێشوەختەی ئەنجوومەنی نوێنەرانی عێراق ھەیە.