لیژنەی ناوچە کوردستانییەکانی دەرەوەی ئیدارەی ھەرێم چه‌ند پرسێكی گرنگى تاووتوێ كرد.
له‌راگه‌یاندراوێكدا، لێژنه‌ی لیژنەی ناوچە کوردستانییەکانی دەرەوەی ئیدارەی ھەرێمی كوردستان له‌په‌رله‌مانی كوردستان بڵاوی كرده‌وه: بەمەبەستی تاووتوێكردنی چەند پرسێکی گرنگ، لێژنه‌كه به‌سەرپەرشتی جه‌مال حه‌وێز جێگری سەرۆکی لیژنه‌و ئامادەبوونی بریاردەرو ئەندامان و ڕاوێژکارانی لیژنەکە کۆبووەوە.
راشیده‌گه‌یه‌نن: كه‌له‌كۆبوونه‌وه‌كه‌دا سەرجەم ئەو ڕاپۆرت و یاداشت و داواکارییانەی ئاراستەی لیژنەكه کرابوون خوێندرانەوە، دوای ده‌ربڕینی ڕاوبۆچوونی ئەندامان له‌باره‌یانه‌وه رێكاری په‌یڕه‌وییان بۆ گیرایه‌به‌رو ئەوانەی پێویستییان به‌وەڵامدانەوە هه‌بوو وەڵامدرانه‌وه، ئەوانەی تریش ئاراستەی سەرۆکایەتیی پەرلەمان کران بۆ کاری پێویست.
لیژنەی ناوچە کوردستانییەکانی دەرەوەی ئیدارەی ھەرێم ئاماژه بۆ ئه‌وه‌ش ده‌كات: دواتر بەگشتی دۆخی ناوچە کوردستانییەکانی دەرەوەی ئێدارەی ھەرێم و دواھەنگاوەکانی جێبەجێکردنی ڕێکكەوتنی نێوان حکومەتی ھەرێم و ناوەند لەبارەی شنگال گفتوگۆی چڕوپڕیان له‌باره‌وه‌كرا، ھەروەھا باس لەو تەعریبە کرا کە لەئێستادا لەسەر ناوچە کوردستانییەکانى ده‌ره‌وه‌ی ئیداره‌ی هه‌رێم ده‌كرێت.
هه‌روه‌ها راشیده‌گه‌یه‌نن: تەوەرێکی دیكه‌ی کۆبوونەوەكه قسەکردن بوو لەسەر ھەڵبژاردنه‌كانى عێراق و چۆنیەتیی بەرێوەچوونی پرۆسەکە لەناوچە جێناکۆکەکان، بۆ ئەو پرسەش ئه‌ندامانى لیژنه‌كه راو سەرنج و تێبینییه‌كانی خۆیان خسته‌ڕوو جه‌ختییان له‌سه‌ر ئه‌وه كرده‌وه كه پێویسته ئه‌و پرسه زۆر به‌جدی لەسەر بکرێت و ئه‌و شێوازى هه‌ڵبژاردنه‌ى ئه‌مجاره كه‌بڕیارى لێدراوه نه‌بێتە هۆى کەمکردنی رێژەی دەنگ و کورسیی کورد لەو ناوچانەدا.
لەکۆتایی کۆبوونەوەكه‌شدا لیژنە بریاریدا بەو زووانە سەردانی وەزیری ناوخۆی حکومەتی ھەرێم بکات بەمەبه‌ستی لەنزیکه‌وه ئاگاداربوون سه‌باره‌ت به ڕێکكەوتنی شنگال و دۆخی سەرجەم ناوچە کوردستانییەکانی دەرەوەی ئێدارەی ھەرێم.
شوان عه‌زیز
کۆمێنت (0)
تا ئێستا هیچ کۆمێنتێک نەکراوە.