هۆشداری له‌سه‌ر جۆری ئه‌م خواردنه‌ ده‌درێت

لیژنه‌ هاوبه‌شه‌كانی قائیمقامیەتی سلێمانی ده‌ست به‌سه‌ر بڕێكی زۆر چەرەسی  جۆری (عه‌لی بابا)ی ره‌نگ كراودا ده‌گرن كه‌ شیاوی خواردن نییه و مەترسیدارە بۆ منداڵان.

ئازاد نه‌بی، نوێنه‌ری ته‌ندروستی سلێمانی له‌ لیژنه‌كان رایگه‌یاند؛ له‌لایه‌ن لیژنه‌ هاوبه‌شه‌كانی قائیمقامیه‌تەوە ده‌ست به‌سه‌ر بڕێكی زۆر عه‌لی بابادا گیراوه‌ كه‌ به‌ (لیمۆندۆزی) و ره‌نگكردنی ئاماده‌كراوه‌ بۆ فرۆشتن.

وتیشی : پێشتر لیژنه‌كانی قائیمقامیەت هه‌مو ئه‌و فڕن و شوێنانه‌ی ئاگاداركردوەته‌وه‌ لیۆمۆندۆزی زۆر و ره‌نگ به‌كارنه‌هێنن له‌كاتی ئاماده‌كردنی چه‌ره‌ساتدا، بەڵام لەکاتی ‌پشكنیندا ده‌ركه‌وتوه‌ ئه‌و ره‌نگه‌ی له‌ ئاماده‌كردنی چه‌ره‌ساته‌كاندا به‌كاریده‌هێنن له‌جه‌سته‌ی مرۆڤدا ده‌نیشێت و‌ كاریگه‌ریی له‌سه‌ر نه‌مانی به‌رگریی له‌ش دروست ده‌كات.

نوێنه‌ره‌كه‌ی ته‌ندروستی سلێمانی داوا له‌ دایكان و باوكان ده‌كات ئاگاداری ئه‌و جۆره‌ خۆراكانه‌ بن منداڵه‌كانیان له فرۆشگای خوێندنگاكان یان لە دوكانی گه‌ڕه‌كه‌كان ده‌یكڕن، له‌كاتی هه‌بونی خۆراكی نه‌شیاو و ماوه ‌به‌سه‌رچودا له‌ رێگەی ژماره‌ (07708677777) لیژنه‌هاوبه‌شه‌كانی قائیمقامیه‌تی سلێمانی لێ ئاگاداربكه‌نه‌وه‌.

ئازاد نه‌بی ئاماژه‌ی بۆ ئه‌وه‌ كرد؛ ته‌واوی ئه‌و بڕه‌ باباعه‌لیه‌ی ده‌ستی به‌سه‌ردا گیراوه‌ له‌ناوده‌برێت و خاوه‌نه‌كه‌ی روبه‌ڕوی رێكاریی یاسایی ده‌كرێته‌وه..