ئایه‌توڵڵا عه‌لی خامه‌نه‌ئی رێبه‌ری كۆماری ئیسلامیی ئێران له دوایین لێدوانیدا ده‌ڵێت ئه‌گه‌ری جه‌نگ و پێكدادانی سه‌ربازیی له‌گه‌ڵ ئه‌مریكا له ئارادا نییه، به‌ڵام پێویسته هێزی سه‌ربازیمان په‌ره به تواناكانیان بده‌ن.
رێبه‌ری ئێران كه له كاتی دیدار له‌گه‌ڵ فه‌رمانده‌كانی سوپای كۆماری ئیسلامیی ئێران وتاری ده‌دا، وتی: هه‌رچه‌نده به‌پێی خه‌مڵاندنه‌كان ئه‌گه‌ری جه‌نگ له‌گه‌ڵ ئه‌مریكا له ئارادا نییه، به‌ڵام سه‌ره‌ڕای ئه‌وه‌ش هێزه سه‌ربازییه‌كانمان ده‌بێ به هۆشیاریی و كارامه‌یی و ئازایه‌تییه‌وه په‌ره بده‌ن به توانا مرۆییه‌كانیان و جیا له‌وه‌ش ئامێره جه‌نگییه‌كانی خۆیان رۆژ له دوای رۆژ تۆكمه‌تر بكه‌ن.
هه‌روه‌ها ئایه‌توڵڵا خامه‌نه‌ئی ماوه‌یه‌ك به‌ر له ئێستاش وتبووی: ئه‌مریكییه‌كان به‌مدواییه ده‌رباره‌ی ئێمه زۆر به بێشه‌رمانه ده‌دوێن. ئه‌وان جیا له سزا ئابوورییه‌كان دوو بابه‌تی دیكه‌ش ده‌وروژێنن، یه‌كه‌م بابه‌تی هه‌ڵگیرسانی جه‌نگ و ئه‌وه‌ی دیكه‌ش دانووستان. بابه‌تی جه‌نگ ده‌وروژێنن تا كه‌سانی ترسنۆك بشڵه‌ژێنن و بۆ بابه‌تی دانووستانیش یارییه‌كی زۆر كۆن و دووباره ده‌خه‌نه‌ڕوو.
له كۆتایی لێدوانه‌كه‌یدا خامه‌نه‌ئی جه‌ختی دووباره‌ی كرده‌وه له فه‌رمانده و كاربه‌ده‌ستانی هێزه چه‌كداره‌كانی وڵاته‌كه‌ی كه پێویسته خۆیان به‌هێز و پته‌و بكه‌ن.
سه‌رچاوه / رادیۆ فه‌ردا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.