دەسەڵاتدارانی ئەمەریکا دوو ئێرانیـیان دەسـتگیرکردووە بە تاوانی سیخوڕی بۆ حکومەتی ئێران، پاش ئەوەی زانیاریـیان لەسەر نەیارانی ڕژێمی تاران لە ناو ئەمەریکا کۆکردبووەوە و بە نهێنی وێنەی چەند شوێنێکی جووەکانیان گرتبوو.
وەزارەتی دادی ئەمەریکا لەم بارەیەوە ڕاگەیاندنێکی بڵاوکردووەتەوە، تیایدا دەڵێت هەریەک لە ئەحمەد ڕەزا محەمەدی دوستدار تەمەن 38 ساڵ و مەجید قوربانی تەمەن 59 ساڵ تۆمەتی سیخوڕیـیان ئاڕاستەکرا بەوەی هەستاون بە چاودێریکردنی چەند شوێنێکی جووەکان و هەروەها هەوڵی دزەکردن بۆ ناو ڕێکخراوی موجاهیدینی خەلق.
هەردووکیان بەپـێی فەرمانی دادگایەکی واشنتنی پایتەخت لە 9 ی ئەم مانگی هەشتە دەستگیرکران.
بەپـێی کەیسەکەیان ئەحمەد ڕەزا محەمەدی دوستدار کە هاوڵاتینامەی ئەمەریکاییشی هەیە، لە مانگی حەوتی ساڵی 2017 چووە بۆ شاری شیکاگۆی ویلایەتی ئلینۆی و لەوێ ئەندامانی دەزگای لێکۆڵینەوەی فیدراڵی FBI بینیویانە وێنەی هەردوو سەنتەری ڕور شاباد هاوس و هیلیلی جووەکانی گرتبوو و بە تایبەتی خاڵە ئاسایشیـیەکانی هەردوو سەنتەرەکە.
لە 20 مانگی نۆی ساڵی 2017 مەجید قوربانی چووە بۆ شاری نیویۆرک و لەوێ وێنەی بەشداربووانی خۆپـیشاندانێکی دژی ڕژێمی ئێرانی گرتبوو کە لەلایەن موجاهیدینی خەلقەوە ڕێکخرابوو. لە مانگی دوازدەی هەمان ساڵ دوستدار لە ئێران گەڕاوەتەوە و لە شاری لۆس ئەنجلسی ویلایەتی کالیفۆرنیا لەگەڵ قوربانی کۆبووەتەوە و نزیکەی 2 هەزار دۆلاری بە قوربانی داوە و ئەویش لە بەرامبەردا 28 وێنەی خۆپـیشاندانەکەی موجاهیدینی پێ داوە لەگەڵ چەند کاغەزێک کە بە دەست نووسراوەتەوە و زانیاریان تێدایە لەسەر ئەوانەی لە وێنەکاندا دەرکەوتوون.
دەزگای FBI قسەکانی هەردووکیانی تۆمارکردووە، كه دەڵێن دوستدار بۆ قوربانی باسکردووە چۆن لە تارانەوە فەرمانی پـێکراوە زانیاریـیەکان کۆبکاتەوە و قوربانیش بۆی باسکردووە چۆن هەوڵی داوە دزەبکاتە نێو ئەندامانی موجاهیدینی خەلقەوە.
بڕیارە ئەمڕۆ سێشەممە قوربانی ببرێتە بەردەم دادگایەکی واشنتۆنی پایتەخت.
کۆمێنت (0)
تا ئێستا هیچ کۆمێنتێک نەکراوە.