ماوه‌ی چه‌ند رۆژێكه هاوڵاتییانی ئێران كه‌مپینێكیان له‌سه‌ر تۆڕه كۆمه‌ڵایه‌تییه‌كانی وه‌ك فه‌یسبووك و ته‌لیگرام ده‌ستپێكردووه كه تیایدا ڤیدیۆیه‌ك بڵاوده‌كه‌نه‌وه له‌سه‌ر شكاندن و توڕهه‌ڵدانی سندوقه‌كانی كۆكردنه‌وه‌ی یارمه‌تیی ده‌زگای خێرخوازیی خومه‌ینی، ئه‌ویش به‌هۆی ئه‌وه‌ی پێیانوایه پاره‌ی رژاوی ده‌ستی خه‌ڵك بۆ نێو ئه‌و سندوقانه ده‌خرێته ده‌ستی خه‌ڵكی فه‌ڵه‌ستین و یه‌مه‌ن و لوبنان.
ئه‌و كه‌مپینه كه ده‌كرێ بوترێ به‌شێوه خۆڕسك سه‌ریهه‌ڵداوه گوایه دوای ئه‌وه بووه كه هه‌رچه‌نده به‌رپرسانی كۆماری ئیسلامیی ده‌ڵێن یارمه‌تییه‌كانی هاوڵاتییانی ئێران كه ده‌درێته " كۆمیته‌ی ئیمدامی ئیمام خومه‌ینی "، ده‌درێت به هه‌ژارانی ناوخۆی ئێران، به‌ڵام له‌لایه‌كی دیكه‌وه هه‌ندی به‌رپرسی ئه‌م وڵاته به ئاشكرا باس له یارمه‌تیی بۆ خه‌ڵكی غه‌ززه ده‌كه‌ن و ته‌نانه‌ت هاوڵاتییانی غه‌ززه‌ش سوپاسی به‌رپرسانی ئێران ده‌كه‌ن سه‌باره‌ت به‌و یارمه‌تییانه‌ی بۆ ئه‌وانیان ناردووه.
له ڤیدیۆكانی هاوڵاتییانی ئێراندا، ئه‌و كه‌سانه‌ی ڤیدیۆكان بڵاوده‌كه‌نه‌وه سندۆقێكی " كۆمیته‌ی ئیمدادی ئیمام خومه‌ینی " كه له دوكان یان ماڵه‌كه‌یانه، ده‌یشكێنن و توڕی هه‌لده‌ده‌نه ناو سه‌له‌ی پاشماوه و به زمانیش ئه‌و شیكردنه‌وه‌یه له‌سه‌ر كاره‌كه‌یان ده‌دركێنن كه ئه‌و سندوقانه سه‌رچاوه‌ی داهاتی خه‌ڵكی فه‌ڵه‌ستین و لوبنان و یه‌مه‌ن و عێراقه، بۆیه ئه‌وان هیچیتر ئاماده‌نین یارمه‌تییه‌كانی خۆیان بخه‌نه ناو سندوقه‌كه‌وه یان راسته‌وخۆ بینێرن بۆ ئه‌و دامه‌زراوه‌یه.
جێگه‌ی باسه كه " كۆمیته‌ی ئیمدادی ئیمام خومه‌ینی " ساڵی 1978 به فه‌رمانی ئایه‌توڵڵا خومه‌ینی دامه‌زرێنه‌ری حكومه‌تی كۆماری ئیسلامیی ئێران به مه‌به‌ستی یارمه‌تیدانی هه‌ژار و كه‌م ده‌رامه‌ته‌كانی ئێران بونیاتنرا و ئامانج لێی نه‌هێشتنی هه‌ژاری بوو، به‌ڵام وه‌ك هاوڵاتییانی ئێرانیی له كه‌مپینه به‌رفراوانه‌كه‌یاندا له‌سه‌ر تۆڕه كۆمه‌ڵایه‌تییه‌كان باسی لێوه ده‌كه‌ن، له ئێستادا ئه‌و ده‌زگای خێرخوازییه بووه‌ته سه‌رچاوه‌ی داهاتی هاوڵاتییانی شیعه‌ی زۆرێك وڵات و به ته‌نها هه‌ژارانی ئێرانن كه له خێروبێری ئه‌و ده‌زگایه بێبه‌شن.
سه‌رچاوه / تۆڕه كۆمه‌ڵایه‌تییه‌كان
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.