له‌ماوه‌ی كه‌متر له هه‌فته‌یه‌كدا دوو بوومه‌له‌رزه‌ی به‌هێز شاری یاسوجیان له رۆژئاوای ئێران هه‌ژاند.
میدیاكانی ئێران بڵاویان كرده‌وه، شه‌وی رابردوو بوومه‌له‌رزه‌یه‌ك به هێزی 4.8 پله به‌پێوانه‌ی ریخته‌ر، شاری یاسوج و چه‌ند گووندێكی سنووری پارێزگای كۆهكیلویه و بۆیر‌ئه‌حمه‌دی له رۆژئاوای ئێران هه‌ژاند.
ئاماژه به‌وه‌شكراوه كه به‌هۆی ئه‌و رووداوه خه‌ڵك ماڵه‌كانیان به‌جێهێشتووه و شه‌ویان تا به‌یانی له‌سه‌ر شه‌قام و شوێنه گشتییه‌كان به‌سه‌ر بردووه و له ئێستادا هێڵه‌كانی كاره‌بای ماڵان بچڕاوه.
جه‌لال پورانفه‌رد سه‌رۆكی تیمه‌كانی فریاكه‌وتنی خێرای پارێزگاكه به ئاژانسی ئیرنای راگه‌یاند: به‌هۆی ئه‌و بوومه‌له‌رزه‌یه 80 كه‌س بریندار بوونه و بۆ چاره‌سه‌ری پێویست ره‌وانه‌ی نه‌خۆشخانه‌كان كراون.
هه‌وره‌ها به بڕیارێكی پارێزگار و به‌هۆی مه‌ترسی پاشله‌رزه و پێشگرتن له هه‌ر ئه‌گه‌رێكی نه‌خوازراوی دیكه، ئه‌مڕۆ دووشه‌مه ده‌وامی ئاسایی له سه‌رجه‌م قوتابخانه و زانكۆكانی شاره‌كانی یاسوج و دێنا و بویر ئه‌حمه‌د راگیراوه.
جێی ئاماژه‌یه چوارشه‌ممه‌ی رابردوو بوومه‌له‌رزیه‌كی دیكه به هێزی 5.2 به پێوه‌ری ریخته‌ر ئه‌م پارێزگایه‌ی هه‌ژاند كه له ئه‌نجامدا زیاتر له 130 كه‌س بریندار بوون و زیانێكی زۆری ماددی كه مه‌زنده ده‌كریت نزیكه‌ی 78 میلیار تومه‌ن بێت، به‌ر پارێزگایه كه‌وت.
کۆمێنت (0)
تا ئێستا هیچ کۆمێنتێک نەکراوە.