1- خولى نایابى تازه‌پێگه‌یشتووانى كوردستان به دوو قۆناغ ئه‌نجام ده‌درێت، واته دواى كۆتای هاتنى یارییه‌كانى قۆناغى یه‌كه‌م، یارییه‌كانى قۆناغى دووه‌م ده‌ست پێده‌كات.
2- به ئاماده‌بوونى نوێنه‌رانى یانه پله‌دووه سه‌ركه‌وتووه‌كانى قۆناغى دووه‌مى خولى پله‌دووه‌ى كوردستان، له‌سه‌ر داواى خۆیان بریاردرا به:
• یارییه‌كان به شێوازى ده‌رچوون به دوو دۆران ئه‌نجام بدرێت.
• هه‌شت یانه‌كه به‌سه‌ر دوو كۆمه‌ڵه به پێی ناوچه‌ى جوگرافى دابه‌ش بكرێت به‌مشێوه‌یه: گرووپى یه‌كه‌م: (ئاسۆ، بروسك، شه‌قڵاوه و شێخان)، گرووپى دووه‌م: (چه‌مچه‌ماڵ، رزگارى، بازیان و خانه‌قین).
• سه‌رجه‌م كارته ره‌نگاو ره‌نگه‌كانى یاریزانان ده‌سرێته‌وه.
• بۆ هه‌ر یانه‌یه‌ك سێ یاریزان له لیستى یاریزانان (كشوفات) زیاد ده‌كرێت.
• یارییه‌كانى یانه‌ى خانه‌قین له یاریگه‌ى چیمه‌نى ده‌ستكرد ئه‌نجام ده‌درێت.
3- له یارى نێوان زاخۆ و دهۆك له خولى نایابى تازه‌پێگه‌یشتووانى كوردستان، به هۆى ده‌رچوون له گیانى وه‌رزشى هێرش كردنه سه‌ر یاریزانان، له لایه‌ن یاریزانى یانه‌ى دهۆك (خالید لوئه‌ى) ژماره (5) بریاردرا:
• راگرتنى بۆ یه‌ك یارى له‌گه‌ڵ مانه‌وه‌ى كارته سووره‌كه‌ى، واته دوو یارى ناتوانێ یارى بكات.
• غه‌رامه‌كردنى ناوبراو به بڕى 150000 سه‌د و په‌نجا هه‌زار دینار.
4- له یارى نێوان بروسك و مه‌خموور له خولى یانه پله‌دووه‌كانى كوردستان، به هۆى دروستكردنى ئاژاوه و هێرشكردنه سه‌ر ناوبژیوانانى یارییه‌كه و به‌كارهێنانى چه‌قۆ له لایه‌ن هانده‌رانى یانه‌ى مه‌خموور، بریاردرا به:
• غه‌رامه‌كردنى یانه‌ى مه‌خموور به بڕى 1000000 یه‌ك ملیۆن دینار.
• سێ یاری لە یارییه‌كانى یانه‌ى مه‌خموور له وه‌رزى 2018/2019 له ده‌ره‌وه‌ى یاریگه‌ى خۆى ئه‌نجام ده‌درێت.
5- له یارى نێوان هه‌ندرێن و زاخۆ له خولى نایابى كوردستان، به هۆى به‌كارهێنانى وته‌ى ناشیرین و جوێندان له لایه‌ن راهێنه‌رى یانه‌ى زاخۆ (ناجى عومه‌ر) بریاردرا:
• راگرتنى ناوبراو بۆ دوو یارى، كه نابێ یاوه‌رى تیپه‌كه‌ى بكات.
• غه‌رامه‌كردنى به بڕى 250000 دوو سه‌د و په‌نجا هه‌زار دینار.
6- دواى لێكۆڵینه‌وه و سه‌ردانى مه‌یدانى لێژنه‌یه‌كى تایبه‌ت بۆ هه‌ردوو شارى سه‌یدسادق و وارماوه، تایبه‌ت به یارییه‌كه‌ى نێوان شه‌هیدان و سه‌یدسادق له خولى پله‌یه‌كى كوردستان، به پێی راپۆرت و روونكردنه‌وه‌ى سه‌رپه‌رشتیار و ده‌سته‌ى ناوبژیوانان و وه‌رگرتنى راى جه‌ماوه‌رى هه‌ردوو یانه، بریاردرا:
• دوورخستنه‌وه‌ى سه‌رپه‌رشتیارى یارى (سه‌لام مه‌حموود) تا كۆتایی هاتنى یارییه‌كانى وه‌رزى 2017/2018 ـى یه‌كێتى تۆپی پێی كوردستان، ئه‌مه‌یش به هۆى ناوزڕاندنى یه‌كێتى تۆپی پێی كوردستان و كه‌مته‌رخه‌مى له كاره‌كه‌یدا.
• راگرتنى ناوبژیوانى ناوه‌ڕاستى یارییه‌كه (هێرش عوسمان) بۆ سێ یارى به هۆى كه‌مته‌رخه‌مى له كاره‌كه‌یدا و به‌رێوه‌بردنى یارییه‌كه.
• راگرتنى یاریزانى یانه‌ى شه‌هیدان (هه‌رێم حوسێن) ژماره (37) بۆ ماوه‌ى یه‌ك ساڵ، له 2018/4/21 تا 2019/4/21.
• ته‌واوكردنى یارییه‌كه به هه‌مان لیستى یاریزانان و ئه‌نجام و سزاكان، له رۆژى دووشه‌ممه 2018/4/23 له كاتژمێر 4:00 ـى ئێواره‌وه له یاریگه‌ى یانه‌ى كۆیه، به بێ ئاماده‌بوونى جه‌ماوه‌رى هه‌ردوو یانه.
• ئه‌نجامدانى یارییه‌كانى داهاتووى هه‌ردوو یانه‌ى سه‌یدسادق و شه‌هیدان له خولى پله‌یه‌كى كوردستان، له ده‌ره‌وه‌ى یاریگه‌ى خۆیان به بێ ئاماده‌بوونى جه‌ماوه‌ر، كه دوورى یاریگه‌كه له یاریگه‌ى خۆیانه‌وه له (200) كم كه‌متر نه‌بێت.
• غه‌رامه‌كردنى هه‌ردوو یانه‌ى شه‌هیدان و سه‌یدسادق به بڕى 1500000 یه‌ك ملیۆن و پێنج سه‌د هه‌زار دینار بۆ هه‌ر یه‌كێكیان.
• تا كێشه‌ى هانده‌رانى ناڕازى یانه‌ى شه‌هیدان له‌گه‌ڵ كارگێرانى یانه‌كه‌یان چاره‌سه‌ر نه‌كرێت، یه‌كێتییه‌كه‌مان به هیچ شێوه‌یه‌ك مامه‌ڵه له‌گه‌ڵ ده‌سته‌ى كارگێرى یانه‌ى شه‌هیدان ناكات.
• له كاتى دووباره‌كردنه‌وه‌ى ئه‌م جۆره ره‌فتار و كێشانه، له لایه‌ن هه‌ردوو یانه‌ى شه‌هیدان و سه‌یدسادق، ئه‌وا یانه‌كه‌یان یه‌ك پله بۆ خواره‌وه داده‌به‌زێت.
7- به ناوى یه‌كێتى تۆپی پێی كوردستان، سوپاس و پێزانین پێشكه‌ش به جه‌ماوه‌رى یانه‌ى ده‌ربه‌ندیخان ده‌كه‌ین، كه ئه‌مساڵ به شێوه‌یه‌كى زۆر شارستانى و جوان له خولى پله‌یه‌كى كوردستان هانى یانه‌كه‌ى خۆیان داوه و رێزیان له تیپى میوان گرتووه، ده‌ستخۆشى تایبه‌تیش له هانده‌ره ئافره‌ته‌كانیان ده‌كه‌ین، كه شان به شانى باوك و برا و هاوسه‌ره‌كانیان له یاریگه ئاماده ده‌بن و خوله‌كه‌یان جوانتر كردووه، به هیواى ئه‌وه‌ى جه‌ماوه‌رى سه‌رجه‌م یانه‌كانى كوردستان چاو له هانده‌رانى ده‌ربه‌ندیخان بكه‌ن.
کۆمێنت (0)
تا ئێستا هیچ کۆمێنتێک نەکراوە.