سه‌عد حه‌دیسی، گوته‌بێژى نووسینگه‌ى حه‌یده‌ر عه‌بادى، سه‌رۆكى ئه‌نجومه‌نى وه‌زیرانى عێراق، به ئاژانسى هه‌واڵى (سه‌پۆتنیك)ى ڕووسی، ڕاگه‌یاند: "دیداره‌كه‌ى عه‌بادى و نێچیرڤان بارزانی، له به‌غدا، زۆر ئه‌رێنی بووه و ڕێككه‌وتن له‌سه‌ر كارى لیژنه تایبه‌ته‌ته‌كان نێوان هه‌ردوولا، به‌تایبه‌ت ده‌روازه سنوورییه‌كان و فڕۆكه‌خانه‌كان و ئاسایشی سنوورى هه‌رێمى كوردستان، كرا".
گوته‌بێژه‌كه باسى له‌وه‌شكرد، كه هه‌ردوولا جه‌ختیان كردووه‌ته‌وه له‌وه‌ى "ده‌روازه سنوورییه‌كان و فڕۆكه‌خانه‌كان" له‌ژێر سه‌رپه‌رشتى حكوومه‌تى فیدڕاڵیدا بن:"له‌ماوه‌یه‌كی نزیكیشدا فه‌رمانبه‌رانى حكوومه‌تى فیدڕاڵ ده‌گه‌نه ئه‌و ده‌روازانه، لیژنه‌كانیش له‌كاره‌كانیان به‌رده‌وام ده‌بن بۆ ئه‌وه‌ى بگه‌نه میكانیزمێك و به‌و پێیه هه‌موو كێشه‌كان چاره‌سه‌ر ببن".
سه‌عد حه‌دیسی، ئه‌وه‌شى ئاشكرا كرد، كه له‌دیداره‌كه‌دا به‌پێویست زانرا دۆسیه‌ی نه‌وت و هه‌نارده‌كانى له كێڵگه‌كانى هه‌رێمى كوردستان، بكه‌وێته ده‌ست كۆمپانیای "سۆمۆ"ى عێراقی و په‌له‌ش بكرێت له‌یه‌كلاییكردنه‌وه‌ى دۆسیه‌ی مووچه‌ى فه‌رمانبه‌رانى هه‌رێمى كوردستان.
به‌گوته‌ى ئه‌و به‌رپرسه، حكوومه‌تى عێراق جه‌ختیكردووه‌ته‌وه له‌وه‌ى "به‌په‌له" كێشه‌ى مووچه چاره‌سه‌ر ده‌كات و شایسته داراییه‌كانیش دواى وردبینیكردنیان له‌لایه‌ن دیوانى چاودێریی داراییه‌وه، ده‌گاته هه‌رێمى كوردستان.
کۆمێنت (0)
تا ئێستا هیچ کۆمێنتێک نەکراوە.