وه‌زیری ده‌ره‌وه‌ی ئه‌مریكا له كۆنفراسێك دا له ئه‌نجوومه‌نی ئه‌تلانتیك رایگه‌یاند : واشنگتن درێژه به پشتیوانی له كوردستان ده‌دات و ئاشكراسی كرد كه هه‌رگیز ده‌ستوور له عێراق به ته‌واوی جێبه‌جێ نه‌كراوه.
رۆژی سێشه‌ممه، له‌سه‌ر بانگهێشتی ئه‌نجوومه‌نی راوێژكاری دامه‌زراوه‌ی كۆریا سه‌ر به ئه‌نجوومه‌نی ئاتلانتیك، ریكس تێلرسۆن ، وه‌زیری كاروباری ده‌ره‌وه‌ی ئه‌مریكا وتارێكی ده‌رباره‌ی سیاسه‌ت و به‌رنامه‌كانی ئه‌مریكا بۆ كاروباری و كێشه‌كانی جیهان پێشكه‌ش كرد و رایگه‌یاند: ئه‌مریكا بۆ وتووێژ له‌گه‌ڵ كۆریا هیچ پێشمه‌رجێكی نییه.
هه‌روه‌ها وه‌زیری كاروباری ده‌ره‌وه‌ی ئه‌مریكا ده‌رباره‌ی كێشه‌كانی نێوان به‌غداو هه‌ولێر رایگه‌یاند: ئێمه پشتگیری نه‌‌هێشتنی ئاڵۆزییه‌كان و ده‌ستپێكردنی گفتوگۆی نێوان هه‌ولێرو به‌غدا به پێی ده‌ستووری عێراقین، كه هه‌رگیز به ته‌واوی جێبه‌جێنه‌كرا.
گوتیشی: ئێمه بۆ جێبه‌جێ كردنی یاسای بنه‌ره‌تی عێراق له پشتی كورد بووین و هه‌رواش ده‌مێنینه‌وه، كه ئه‌گه‌ر به ته‌واوی ده‌ستوور جێبه‌جێ بكرێ ژماره‌یه‌ك له داوا و سكاڵاكانی نه‌ته‌وه‌ی كورد كه پێشتر هه‌یانبووه، به‌دی دێت.
ره‌حیم ره‌شیدی ، ده‌زگای سه‌ته‌لایتی كوردستان واشنگتن
پێداچوونه‌وه: رزگار
کۆمێنت (0)
تا ئێستا هیچ کۆمێنتێک نەکراوە.