راگه‌یاندنه‌كانی ئه‌مریكا رایانگه‌یاندووه كه حكومه‌تی توركیا پێشنیاری پێدانی 15 ملیۆن دۆلار به‌رتیلی كردووه به مایك فلین تا فه‌تحوڵڵا گوله‌ن بۆ ئه‌وان بڕفێنێت و راده‌ستیان بكاته‌وه .
مایك فلین كه یه‌كێكه له كه‌سه نزیكه‌كانی ترامپی سه‌رۆك كۆماری ئه‌مریكا، بۆ ماوه‌یه‌كی كورت له كابینه‌ی ترامپدا پۆستی سه‌رۆكی ئه‌نجومه‌نی ئاسایشی نه‌ته‌وه‌یی ئه‌م وڵاته‌ی به‌ڕێوه‌برد .
كه‌ناڵی ئێن بی سی و رۆژنامه‌ی وۆڵ ستریت ژۆرناڵ رایانگه‌یاندووه كه مایك فلین و كوڕه‌كه‌ی سه‌باره‌ت به بابه‌تی رفاندن و راده‌ست كردنه‌وه‌ی گوله‌ن، له‌گه‌ڵ چه‌ند كه‌سێكی نێردراوی حكومه‌تی توركیا وتووێژیان كردووه .
ئێستاش وه‌زاره‌تی دادی ئه‌مریكا لێكۆڵینه‌وه له‌سه‌ر ناوه‌ڕۆكی ئه‌و زنجیره دانووستانه ده‌كات كه مایك فلین له ناوه‌ڕاستی مانگی دیسه‌مبه‌ری ئه‌مساڵ له نیویۆرك له‌گه‌ڵ به‌رپرسانی توركیا هه‌یبووه .
ئێستاش لێكۆڵه‌ران ئامانجیانه بزانن ئایا مایك فلین ئه‌و كاته‌ی پۆستی سه‌رۆكی ئه‌نجومه‌نی ئاسایشی نه‌ته‌وه‌یی ئه‌مریكای به‌ڕێوه‌بردووه،گوشاری خستووه‌ته سه‌ر حكومه‌ت تا فه‌تحوڵڵا گوله‌ن راده‌ستی توركیا بكرێته‌وه یان نا .
جێگه‌ی باسه له‌لایه‌كی دیكه‌شه‌وه وته‌بێژی كۆمپانیای مایك فلین پێشتر رایگه‌یاندبوو كه ناوبراو سه‌باره‌ت به هیچ پرسێكی نایاسایی وتووێژی له‌گه‌ڵ توركیا نه‌كردووه .
سه‌رچاوه / بی بی سی
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.