به‌رێوه‌به‌ری ئاسایشی كه‌ركوكی یه‌كێتی رایده‌گه‌ێنێ، حكومه‌تی عێراق داوای لێكردووین هاوكاری ده‌زگا ئه‌منییه‌كانی نێو شاری كه‌ركوك بكه‌ین.
عه‌مید هه‌ڵكه‌وت محه‌مه‌د، به‌رێوه‌به‌ری ئاسایشی كه‌ركوكی یه‌كێتی، به‌ده‌نگی ئه‌مه‌ریكای راگه‌یاندووه:حكومه‌تی عێراق داوای هاوكاری لێكردووین بۆ به‌ره‌نگاربوونه‌وه‌ی تیرۆر و هاوكاری كردنی ده‌زگا ئه‌منیه‌كانی عێراق.
هه‌روه‌ها گوتی: ئێمه داوامانكردووه وه‌كو پێش 16 ی مانگی رابردوو ، هێزه‌كانمان رۆڵی پێبدرێت له‌نێو كه‌ركوكدا و باره‌گامان هه‌بێت، گه‌رچی گفتوگۆ هه‌یه به‌ڵام رێككه‌وتن نه‌كراوه.
ناو به‌ناو له‌نێو كه‌ركوكدا له‌لایه‌ن خۆبه‌خشه كورده‌كانه‌وه ته‌قه چه‌كدارانی حه‌شدی شه‌عبی ده‌كرێت، ئه‌مه‌ش وایكردووه له‌نێو شاره‌كه‌دا رێوشوێنی ئه‌منی توند بگیرێته به‌ر و ناو به‌ناو ماڵه كورده‌كانیش بپشكنرێت، ره‌نگه عێراق بیه‌وێت به‌هاوكاری به‌شێك له ئاسایشی كوردی دۆخه‌كه كۆنترۆڵ بكات.
به‌پێی زانیاریه‌كانی ده‌نگی ئه‌مه‌ریكا، گفتووگۆ له‌نێوان هێزه كوردیه‌كان و حكومه‌تی ناوه‌ندی به‌رده‌وامه، بۆ ئاساییكردنه‌وه‌ی دۆخی كه‌ركوك و گه‌رانه‌وه‌ی هێزه كوردیه‌كان بۆ شاره‌كه، ئه‌وه‌ش له‌كاتێكدایه جگه له‌یه‌كێتی نیشتیمانی، زۆربه‌ی حیزبه كوردیه‌كان كه‌ركوكییان جێهێشتووه.
دوای داگیركردنی كه‌ركوك، شه‌وانه له‌لایه‌ن سوپاو میلیشیاكانی حه‌شدی شه‌عبی هێرش ده‌كرێته سه‌رماڵه كورده‌كان و گه‌نجان ره‌شبگیری ده‌كرێن، گه‌نجانی خۆبه‌خشی كوردیش ئه‌م زوڵم و سته‌مه قه‌بووڵ ناكه‌ن و به‌ره‌نگارییان ده‌بنه‌وه.
کۆمێنت (0)
تا ئێستا هیچ کۆمێنتێک نەکراوە.