گوته‌بێژی وه‌زاره‌تی ده‌ره‌وه‌ی ئه‌مریكا رایگه‌یاند، ئـه‌وان ئـاگاداری شه‌ھید كردنی ئـه‌ركان شه‌ریف ڕۆژنامه‌وانی ده‌زگای سه‌ته‌لایتی كوردستانن.
ڕۆژی دووشه‌ممه، هێزه‌ر ناوێرت، گوته‌بێژی وه‌زاره‌تی ده‌ره‌وه‌ی ئه‌مریكا،
وه‌ڵامی چه‌ند پرسیارێكی له‌باره‌ی رووداوه‌كانی عێراق و هه‌رێمی كوردستان دایه‌وه.
له‌باره‌ی شه‌ھید كردنی ئـه‌ركان شه‌ریف رۆژنامه‌ڤانی كورد له داقووق و بڕیاری قه‌ده‌خه‌كردنی ڕاگه‌یه‌نه‌ره كوردییه‌كان له‌لایه‌ن به‌غدا، هێزه‌ر ناوێرت گووتی:ئاگاداری هه‌موو رووداوه‌كان نین، به‌ڵام ئاگاداری ئه‌وه‌ین رۆژنامه‌ڤانێك له كه‌ركووك كوژراوه، ئاگاداری هه‌موو ورده‌كارییه‌كانی دیكه نین و زانیاریمان له‌و باره‌وه پێده‌گات. هه‌روه‌ها ئاگاداری ئه‌وه‌ین كه میدیاكان له‌گه‌ڵ حكومه‌تی ناوه‌ندی گرفتیان هه‌یه. به‌گشتی بۆچوونی ئێمه له‌باره‌ی ئازادی میدیا نه‌گۆڕاوه و ده‌ڵێین كه ئازادی میدیا و رۆژنامه‌ڤانی بۆ پرۆسه‌ی دێموكراسی هه‌ر وڵاتێك گرینگه.
له‌باره‌ی ناساندنی ئه‌بو مه‌هدی موهه‌ندیس و فه‌رمانده‌كانی دیكه‌ی حه‌شدی شه‌عبی به تیرۆریست، گوته‌بێژی وه‌زاره‌تی ده‌ره‌وه‌ی ئه‌مریكا رایگه‌یاند،ئه‌بو مه‌هدی موهه‌ندیس یه‌كێكه له‌وانه‌ی له ساڵی ٢٠٠٩ به‌م لاوه له لیستی تیرۆردایه.
سه‌باره‌ت به هه‌رێمی كوردستان و پێشمه‌رگه، گوته‌بێژی وه‌زاره‌تی ده‌ره‌وه‌ی ئه‌مریكا رایگه‌یاند:ئێمه رێزێكی زۆرمان بۆ قاره‌مانێتی و ئازایه‌تی پێشمه‌رگه هه‌یه له شه‌ڕی دژی داعش، له‌و باره‌وه هه‌ڵوێستمان هه‌رگیز نه‌گۆڕاوه و ئه‌وان به هێزێكی كاریگه‌ر ده‌زانین.
له وه‌ڵامی پرسیارێكدا له‌باره‌ی ئه‌وه‌ی هێزه عێراقییه‌كان چه‌كی قورسی ئه‌مریكی دژ به كورد به‌كارده‌هێنن، هێزه‌ر ناوێرت گوتی :به‌دڵنیایی ئێمه راهێنانمان به هێزه كوردییه‌كان و هێزه‌كانی حكومه‌تی عێراق كردووه. ده‌زانین هه‌ندێ پرسیار له‌و باره‌وه كراوه، به‌ڵام ئێمه به هیچ شێوه‌یه‌ك چه‌كمان به‌و گرووپانه نه‌داوه و پشتگیریمان نه‌كردوون، كه به تیرۆریست ناسراون و مافه‌كانی مرۆڤیان پێشێلكردوون و له‌ژێر ده‌سه‌ڵاتی حكومه‌تی عێراقدا نین، پێموایه هه‌ڵوێستمان له‌و باره‌وه زۆر روون بووه.
کۆمێنت (0)
تا ئێستا هیچ کۆمێنتێک نەکراوە.