رۆژی هه‌ینی مۆسكۆ رایگه‌یاند كه ڤیلادیمیر پۆتین سه‌رۆك كۆماری رووسیا له مانۆڕێكی سه‌ربازیدا به فه‌رمانی كه‌سیی خۆی رێگه‌یداوه به تاقیكردنه‌وه‌ی موشه‌كی كیشوه‌ربڕ .
به‌گوێره‌ی ئاژانسی رۆیته‌رز دیمیتری پیسكۆڤ وته‌بێژی كۆشكی كرملین وێڕای راگه‌یاندنی ئه‌م هه‌واڵه، وتیشی هێزه‌كانی سێیانه‌ی ئه‌تۆمیی رووسیا، واته ژێرده‌ریاییه ئه‌تۆمییه‌كان و بۆمب هاوێژه ئه‌تۆمییه‌كان و سكۆكانی هاویشتنی موشه‌ك، ئه‌و مانۆڕه‌یان له رۆژی پێنجشه‌ممه‌دا ئه‌نجامداوه.
ناوبراو هه‌روه‌ها وتیشی ئه‌و مانۆڕه ته‌نیا تاقیكردنه‌وه‌یه‌كی ئاسایی بووه له بواری سه‌ربازیدا و په‌یوه‌ندیی نییه به هیچ كام له گۆڕانكارییه نێوده‌وڵه‌تییه‌كانه‌وه.
به‌ڵام به وته‌ی شاره‌زایان به‌شداریی راسته‌وخۆی سه‌رۆك كۆماری رووسیا له ئه‌زموونێكی سه‌ربازیی هێزه چه‌كداره‌كانی وڵاته‌كه‌یدا و چاودێریی كه‌سیی ناوبراو له‌سه‌ر هاویشتنی موشه‌كی كیشوه‌ربڕ، هه‌واڵێكه كه كۆشكی كرملین زۆر به ده‌گمه‌ن له رابردوودا بڵاوی كردووه‌ته‌وه.
جێگه‌ی ئاماژه‌یه كه رووسیا ماوه‌یه‌كه په‌یوه‌ندییه‌كانی له‌گه‌ڵ ئه‌مریكا و هاوپه‌یمانه ئه‌وڕوپییه‌كانی به‌ره‌و ئاڵوزیی رۆیشتووه، ته‌نانه‌ت په‌یمانی باكووری ئه‌تڵه‌سی واته ناتۆ، له مانگی سێپته‌مبه‌ردا نیگه‌رانی خۆی ده‌ربڕیبوو به‌رامبه‌ر به ئه‌نجامی مانۆڕی سه‌ربازیی زاپاد (رۆژئاوا)، له‌لایه‌ن رووسیاوه.
سه‌رچاوه / ماڵپه‌ڕی ده‌نگی ئه‌مریكا
مه‌سعود مه‌عروف / كوردستان تی ڤی
کۆمێنت (0)
تا ئێستا هیچ کۆمێنتێک نەکراوە.