نه‌ته‌وه یه‌كگرتووه‌كان نیگه‌رانی خۆی له توندوتیژی و رووخاندنی خانووی خه‌ڵك له‌لایه‌ن حه‌شدی شه‌عبی و سوپای عێراق راده‌گه‌یه‌نێت و ده‌ڵێ، به‌هۆی كرده‌وه سه‌ربازییه‌كه‌ی حكوومه‌تی عێراق تا ئێستا 136 هه‌زار كه‌س له ناوچه‌كانی ده‌ره‌وه‌ی ئیداره‌ی هه‌رێمی كوردستان ئاواره بوونه.
لیز گراندی هه‌ماهه‌نگی كاروباری مرۆیی له نه‌ته‌وه یه‌كگرتووه‌كان رایگه‌یاند ، ده‌ست كراوه به گه‌یاندن و پێشكه‌شكردنی كۆمه‌ك به ئاواره‌كان و تیمه‌كانی نه‌ته‌وه یه‌كگرتووه‌كان سه‌ردانی كه‌مپ و گونده‌كانی كردووه بۆ پێشكه‌شكردنی چاودێری پزیشكی و دابه‌شكردنی هاوكارییه‌كان.
هاوكات به توندی نیگه‌رانی خۆی له كرده‌وه‌ی توندوتیژی بۆ سه‌ر ئاواره‌كان ده‌ربڕی كه له‌لایه‌ن حه‌شدی شه‌عبی ئه‌نجام دراوه.
به پێی ئه‌و راپۆرتانه‌ی بڵاو كراونه‌ته‌وه كه هاوكاته له‌گه‌ڵ سووتاندن و رووخاندنی سه‌دان ماڵی كورد له‌و ناوچانه به تایبه‌ت له كه‌ركووك و خورماتوو.
فه‌رخان حه‌ق جێگری ئه‌مینداری گشتی نه‌ته‌وه یه‌كگرتووه‌كان له كۆنگره‌یه‌كی رۆژنامه‌وانیدا رایگه‌یاند، هه‌ست به دڵه‌ڕاوكێیه‌كی توند ده‌كه‌ن له‌باره‌ی به‌رزبوونه‌وه‌ی ژماره‌ی ئاواره‌كان داواشی له هه‌رێمی كوردستان و عێراق كرد كه دان به‌خۆیاندا بگرن و كێشه‌كانی نێوانیان به دیالۆگ له‌سه‌ر بنه‌مای ده‌ستووری عێراق چاره‌سه‌ر بكه‌ن.
سوهێل تاهیر : كوردستان تیڤی
کۆمێنت (0)
تا ئێستا هیچ کۆمێنتێک نەکراوە.