ئه‌رسه‌لان عه‌لی ، به‌رپرسی ناوچه‌ی دوزخورماتووی پارتی دیموكراتی كوردستان، به ماڵپه‌ری ده‌زگای سه‌ته‌لایتی كوردستانی راگه‌یاند: ماوه‌ی سێ رۆژه دوزخورماتو له‌لایه‌ن هێزه‌كانی سه‌ربه حه‌شدی شه‌عبی داگیركراوه‌و دوای ئه‌وه‌ی قه‌تل و عامێكی بێ شوومار كرایه سه‌ر كورده‌كان ، ناچاریان كردن كه ماڵ و حاڵی خۆیان له دوزخورماتوو به جێبهێڵن، ئێستاش شاره‌كه به‌ته‌واوی له كورد قه‌ڵاچۆكراوه‌و ماڵ و خانووی كورده‌كان تاڵان ده‌كرێن و ده‌سووتێندرێن.
هه‌روه‌ها گوتی: گه‌ڕانه‌وه‌ی كورده‌كان بۆ ناو دوزخورماتو به هه‌موو شێوه‌یه‌ك قه‌ده‌غه كراوه، ئه‌وه‌ی بیه‌وێ بگه‌ڕێته‌وه‌و رووبه‌رووی ئازارو ئه‌شكه‌نجه‌یه‌كی زۆر ده‌بێته‌وه‌و هه‌ڕه‌شه‌ی كوشتنیشی لێده‌كرێت و زیاتریش پارتییه‌كان ئامانجی هێزه‌كانی حه‌شدی شه‌عبین.
گوتیشی: هاووڵاتیانی كوردی دوزخورماتو ، ئاواره‌ی كه‌لارو كفری و دێهاته‌كانی ده‌وربه‌ری دوزخورماتو بوون و به‌شێكیشیان هاتوونه‌ته هه‌ولێر.
جه‌ختیشیكرده‌وه، كه بارودۆخی هاووڵاتیانی كوردی دوزخورماتو زۆر ناهه‌مواره‌و داوای كۆمه‌ك و هاوكاری له حكومه‌تی هه‌رێمی كوردستان و رێكخراوه خێرخوازه‌كانی كۆمه‌ڵگای مه‌ده‌نی ده‌كه‌ن.
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.