دۆناڵد ترەمپ، سەرۆکی ئەمەریکا، پشتیوانیی تەواو و بێ مەرجی خۆی بۆ بنیامین نەتەنیاهۆ، سەرۆکوەزیرانی ئیسرائیل لە هەڵبژاردنە پەرلەمانییەکەی 27ـی تشرینی یەکەمی 2026 ڕاگەیاند.
ترەمپ لە پەیامێکدا نەتەنیاهۆی بە "شەریکێکی نایاب لە بەدیهێنانی ئاشتی" و "سەرۆکوەزیرانێکی جەنگاوەری ناوازە" ناو برد. لە بەرامبەردا نەتەنیاهۆ سوپاسی ترەمپی کرد و جەختی لەسەر بەردەوامیی کارکردنی هاوبەش بۆ "لەناوبردنی هەڕەشەی ئێران" کردەوە.
ئەم پشتیوانییەی ترەمپ لە کاتێکدایە کە ڕاپرسییەکان ئاماژە بە کێبڕکێیەکی توند دەکەن لە نێوان نەتەنیاهۆ و سەرەکیترین ڕکابەرەکەی، گادی ئایزینکۆت. ئایزینکۆت ڕەخنەی لە هەڵوێستەکەی ترەمپ گرت و ڕای گەیاند: "ئیسرائیل وڵاتێکی دیموکراتە و تەنها هاووڵاتییانی خۆی دەتوانن سەرکردەکانیان هەڵبژێرن."
لەلایەکی دیکەوە، عەباس عێراقچی، وەزیری دەرەوەی ئێران، هۆشداری دا کە نەتەنیاهۆ هەوڵ دەدات ئەمەریکا بەرەو شەڕێکی نوێ ببات و جەختی کردەوە کە هەر هەوڵێکی لەو جۆرە کاردانەوەی توندی ئێرانی لێ دەکەوێتەوە.
جێگەی باسە ئەم هەڵبژاردنە یەکەم هەڵبژاردنی ئیسرائیلە لە دوای هێرشەکانی حەماس و دەستپێکی جەنگی کەرتی غەززە لە 7ـی تشرینی یەکەمی 2023. نەتەنیاهۆ کە لە کانوونی یەکەمی 2022ـەوە گەڕاوەتەوە بۆ پۆستەکەی، بە یەکێک لە درێژخایەنترین سەرۆکوەزیرانی مێژووی ئیسرائیل دەژمێردرێت.
کۆمێنت (0)
تا ئێستا هیچ کۆمێنتێک نەکراوە.