بەڕێوەبەری فڕۆکەخانەی نێودەوڵەتیی هەولێر ڕایگەیاند کە سەرەڕای ئەو هێرشە درۆنییانەی بەیانی ئەمڕۆ ئاسمانی شارەکەیان کردە ئامانج، پڕۆسەی گەشتە ئاسمانییەکان بە شێوەیەکی ئاسایی و بەپێی خشتەی کاتیی دیاریکراو بەردەوامە.
ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر، لە لێدوانێکدا بۆ (کوردستان تیڤی) پشتڕاستی کردەوە کە زنجیرە هێرشە درۆنییەکەی بەیانی ئەمڕۆ هەینی (24ی تەممووزی 2026)، هیچ جۆرە پەککەوتن یان دواکەوتنێکی لە گەشتەکاندا دروست نەکردووە. ئەو ئاماژەی بەوە کرد کە سەرجەم درۆنە هێرشبەرەکان لە لایەن سیستمەکانی بەرگریی ئاسمانییەوە لە ئاسماندا تێکشکێنراون و گەشتەکان بە بێ کێشە بەڕێوە دەچن.
هۆشیار جەختی کردەوە کە ژێرخانی فڕۆکەخانەکە پارێزراوە و تیمەکان لە ئەرکەکانی خۆیان بەردەوامن بۆ دڵنیابوونەوە لە سەلامەتیی گەشتیاران و فڕۆکەکان. ئەم لێدوانە وەک پەیامێکی دڵنیایی دێت دوای ئەوەی دەنگی چەند تەقینەوەیەکی بەهێز لە ئاسمانی هەولێر بیسترا، کە بووە هۆی دروستبوونی نیگەرانی لەبارەی وەستانی جووڵەی ئاسمانی لە ناوچەکەدا.
ئەم پەرەسەندنە نوێیە لە کاتێکدایە کە هەرێمی کوردستان و ناوچەکە بە گشتی لەژێر بارگرژییەکی توندی ئەمنیدایە. لە ماوەی 14 ڕۆژی ڕابردوودا، ئاسمانی هەولێر چەندین جار شاهیدی هێرشی لەم شێوەیە بووە، بەڵام بەرپرسانی فڕۆکەخانە بەردەوام جەختیان لەوە کردووەتەوە کە ڕێکارە ئەمنییەکان لە بەرزترین ئاستدان بۆ پاراستنی دەروازە ئاسمانییەکانی هەرێم.
کۆمێنت (0)
تا ئێستا هیچ کۆمێنتێک نەکراوە.