ئەنجومەنی باڵای دادوەریی عێراق ڕوونکردنەوەیەکی گرنگی سەبارەت بە ستراتیژی نوێی دادگا لە مامەڵەکردن لەگەڵ دۆسیەکانی گەندەڵیی دارایی و کارگێڕی بڵاوکردەوە. دادگا جەخت دەکاتەوە کە ئامانجیان تەنها سزادانی تاوانباران نییە، بەڵکو لەوە گرنگتر گەڕاندنەوەی پارە دزراوەکانی دەوڵەتە، ئەمەش لە ڕێگەی میکانیزمی یاسایی و دەستوورییەوە ئەنجام دەدرێت کە ڕێگە بە کەمکردنەوەی سزا دەدات بەرامبەر گەڕاندنەوەی پارەکان.
ئەنجومەنی باڵای دادوەری وردەکاریی دۆسیەی ناسراو بە "دزیی سەدە"ی خستە ڕوو، کە تێیدا چەندین کۆمپانیای وەک (القانت و المبدعون) بە ڕێکاری نایاسایی دەستیان بەسەر ئەماناتی باجی کۆمپانیا بیانییەکاندا گرتووە. سەبارەت بە تۆمەتباری سەرەکی "نوور زوهێر"، دادگا ئاشکرای کرد کە بە ڕێککەوتنی نێوان سەرۆکی دادگا و سەرۆک وەزیرانی پێشوو (مستەفا کازمی)، ناوبراو بە کەفالەت ئازاد کرا بۆ ئەوەی پارەکان بگەڕێنێتەوە.
تاوەکو ئێستا نوور زوهێر بڕی 365 ملیار دیناری لە کۆی 1.618 ترلیۆن دینار گەڕاندووەتەوە. بەڵام دوای ئەوەی ناوبراو گەشتی دەرەوەی کرد و پرۆسەی گەڕاندنەوەی پارەکەی ڕاگرت، دادگا سزای 10 ساڵ زیندانیی بە غیابی بۆ بڕییەوە و لە ڕێگەی پۆلیسی نێودەوڵەتییەوە (Interpol) هەوڵی گەڕاندنەوەی دەدرێت. لە ئێستادا پارێزەرەکەی داوای کردووە بە یاسای لێبوردنی گشتی بیگرێتەوە بەرامبەر گەڕاندنەوەی تەواوی پارەکان، بەڵام ئەمە بەستراوەتەوە بە ڕەزامەندیی وەزارەتی دارایی کە تا ئێستا وەڵامی دادگای نەداوەتەوە.
سزای فەرمانبەران و بەرپرسانی حکومەتی پێشوو
دادگا ڕایگەیاند کە جگە لە نوور زوهێر، 12 فەرمانبەری باڵای دەستەی باج بە شێوەی ئامادەیی (حزوری) سزای زیندانییان بۆ بڕاوەتەوە و ئێستا لە زینداندان. هەروەها سزای زیندانیی بە غیابی بۆ بەڕێوەبەری نووسینگەی سەرۆک وەزیرانی پێشوو و ژمارەیەک لە ڕاوێژکارەکانی دەرچووە و سەروەت و سامانیان لە عێراق و وڵاتی کوێت دەستی بەسەردا گیراوە. سەبارەت بە سەرۆک وەزیرانی پێشوو (مستەفا کازمی)، دادگا ڕایگەیاند کە لێکۆڵینەوەی لەگەڵ کراوە، بەڵام بەهۆی کەمیی بەڵگەوە دۆسیەکەی داخراوە.
لە بەشێکی دیکەی ڕوونکردنەوەکەدا، دادگا ئاماژەی بە دۆسیەی "پاڵاوگەکانی باکوور" و تۆمەتبار "عەدنان جومەیلی" و ژمارەیەک پەرلەمانتار کرد. دادگا دەڵێت ئەگەر تاوانەکانیان پێش دەرچوونی یاسای نوێی لێبوردنی گشتی بێت، هەمان میکانیزم (گەڕاندنەوەی پارە بەرامبەر سوککردنی سزا)یان بەسەردا جێبەجێ دەکرێت. بەڵام ئەگەر تاوانەکە دوای یاساکە بێت، ئەوا ڕێکاری توندیان بەرامبەر دەگیرێتە بەر چونکە یاسای لێبوردن نایانگرێتەوە.
لە کۆتاییدا، ئەنجومەنی باڵای دادوەری ڕایگەیاند کە لە ئێستادا بە هەماهەنگی لەگەڵ سەرۆک وەزیران محەمەد شیاع سوودانی، کار لەسەر داڕشتنی "نەخشەڕێگایەک" دەکرێت بۆ گەڕاندنەوەی سەروەت و سامانی دەوڵەت. ئەم پلانە کار دەکات بۆ هاندانی تۆمەتباران تاوەکو بە ئارەزووی خۆیان پارە دزراوەکان بگەڕێننەوە بۆ گەنجینەی دەوڵەت، لە بەرامبەردا دادگا ڕێکاری یاسایی سوکتریان بەرامبەر دەگرێتە بەر، ئەمەش وەک خێراترین ڕێگە بۆ کۆتاییهێنان بە هەدەردانی سامانی گشتی لە عێراقدا دەبینرێت.
کۆمێنت (0)
تا ئێستا هیچ کۆمێنتێک نەکراوە.