ئەمریکا، ئێران و پاکستان ڕێککەوتنێکی 14 خاڵییان بۆ ئاشتی واژۆ کرد
وەک هەنگاوێکی مێژوویی و کەم وێنە بۆ کۆتاییهێنان بە شەڕ و ئاڵۆزییەکانی ڕۆژهەڵاتی ناوەڕاست، هەریەکە لە ویلایەتە یەکگرتووەکانی ئەمریکا، کۆماری ئیسلامی ئێران و پاکستان، بە فەرمی واژۆیان لەسەر ڕێککەوتننامەیەکی 14 خاڵی کرد کە ئامانج لێی کوژاندنەوەی ئاگری شەڕ و چەسپاندنی ئاشتییە لە ناوچەکەدا.
واژۆکردنی ئەم یاداشتە لە سێ شوێنی جیاواز و لە یەک کاتدا ئەنجام درا؛ دۆناڵد ترەمپ، سەرۆکی ئەمریکا لە شاری پاریسی پایتەختی فەرەنساوە واژۆی لەسەر بەڵگەنامەکە کرد، هاوکات مەسعوود پزیشکیان، سەرۆک کۆماری ئێران لە تارانەوە ڕێککەوتنەکەی واژۆ کرد و لە یەکەم لێدوانیدا ڕایگەیاند کە ئەم هەنگاوە "بۆ ئێران زۆر باشە". لە هەمان کاتدا، شەهباز شەریف، سەرۆکوەزیرانی پاکستان، لە پایتەختی وڵاتەکەیەوە وەک لایەنی ناوەندگیری سەرەکی واژۆی لەسەر هەمان ڕێککەوتن کرد.
ئەم ڕێککەوتنە 14 خاڵییە، کە بە "سێ واژۆ و یەک ئامانج" دەناسرێت، وەک ئاوێک دەبینرێت بە ئاگری ئەو شەڕە گەورەیەدا بکرێت کە ماوەیەکی درێژە هەڕەشە لە ئاسایشی ناوچەکە و جیهان دەکات. خاڵەکانی ناو ڕێککەوتنەکە بوارەکانی ئاگربەست، لادانی گەمارۆ ئابوورییەکان و گەڕاندنەوەی سەقامگیری بۆ ڕێڕەوە دەریاییەکان لەخۆ دەگرێت، کە چاوەڕوان دەکرێت ببێتە سەرەتایەکی نوێ بۆ پەیوەندییە نێودەوڵەتییەکان لە ڕۆژهەڵاتی ناوەڕاستدا.
سەرکردەکانی هەرسێ وڵات جەختیان لەوە کردووەتەوە کە ئەم یاداشتە تەنیا واژۆیەکی سەر کاغەز نییە، بەڵکو پابەندییەکی جددییە بۆ گۆڕینی زمانی چەک بۆ زمانی دیپلۆماسی و ئاوەدانکردنەوە.
کۆمێنت (0)
تا ئێستا هیچ کۆمێنتێک نەکراوە.