سەرۆکوەزیرانی عێراق لە پەیوەندییەکی تەلەفۆنیدا لەگەڵ سەرۆکی هەرێمی کوردستان،ئیدانەی هێرشەکەی دهۆکی کرد و فەرمانی دا بە پێکهێنانی تیمێکی ئەمنیی هاوبەش بۆ دۆزینەوەی تاوانباران.
ئەمڕۆ شەممە 28-3-2026، محەمەد شیاع سوودانی، سەرۆک وەزیرانی عێراق پەیوەندییەکی تەلەفۆنی لەگەڵ نێچیرڤان بارزانی، سەرۆکی هەرێمی کوردستان ئەنجامدا.
لە پەیوەندییەکەدا :"سوودانی بە توندی ئیدانەی ئەو هێرشە "ناڕەوایەی" کرد کە کرایە سەر ماڵەکەی نێچیرڤان بارزانی لە پارێزگای دهۆک و ستایشی هەڵوێستە نیشتمانییەکانی سەرۆکی هەرێمی کرد لە پاراستنی یەکڕیزی عێراقییەکاندا".
سەرۆکوەزیرانی عێراق فەرمانی دا بە پێکهێنانی تیمێکی ئەمنی و تەکنیکی هاوبەش لە نێوان دەزگا ئەمنییەکانی حکوومەتی فیدراڵ و حکوومەتی هەرێمی کوردستان، بە مەبەستی لێکۆڵینەوە لە وردەکاریی ڕووداوەکە و دەستنیشانکردنی تاوانباران تاوەکو ڕێکاری یاسایی توندیان لەبەرانبەر بگیرێتەبەر.
هەر لەو پەیوەندییەدا، سوودانی جەختی لەوە کردەوە کە حکوومەت سوورە لەسەر ڕێگریکردن لە هەر لایەنێکی نایاسایی یان هەرێمی و نێودەوڵەتی کە بیەوێت عێراق پەلکێشی ناو ململانێ سەربازییەکانی ناوچەکە بکات.
ئاماژەی بەوەش کرد، کە هەموو هەوڵەکان بۆ پاراستنی سەروەریی خاک و ئاسمانی عێراق و دڵنیاییدان لە سەقامگیری وڵات بەردەوام دەبن لە چوارچێوەی بەرپرسیارێتییەکی نیشتمانی گشتگیردا.
کۆمێنت (0)
تا ئێستا هیچ کۆمێنتێک نەکراوە.