وەزارەتی دەرەوەی چین ڕایگەیاند، ڕێککەوتنی نوێی بازرگانییان لەگەڵ کەنەدا تەنیا لە بەرژەوەندیی هەردوو گەلە و دژی هیچ لایەنێکی دیکە نییە، ئەوەش دوای هەڕەشەکانی دۆناڵد ترەمپ دێت.
ئەمڕۆ دووشەممە 26ـی کانوونی دووەم، وۆ جیاکون، وتەبێژی وەزارەتی دەرەوەی چین لە کۆنفرانسێکی ڕۆژنامەوانیدا جەختی کردەوە کە ڕێککەوتنی بازرگانیی سەرەتایی ئەم دواییەیان لەگەڵ کەنەدا، بە هیچ شێوەیەک لایەنی سێیەم ناکاتە ئامانج.
وتەبێژی وەزارەتی چین ڕوونی کردەوە: "پەکین و ئۆتاوا خەریکی بنیاتنانی هاوبەشییەکی ستراتیژیی لە جۆرێکی نوێن، کە خزمەت بە بەرژەوەندیی هاوبەشی هەردوو گەل دەکات و بەشدار دەبێت لە ئاشتی، سەقامگیری، گەشەپێدان و خۆشگوزەرانی لە جیهاندا".
ئەم لێدوانە وەک وەڵامێکە بۆ هەڕەشەکانی دۆناڵد ترەمپ، سەرۆکی ویلایەتە یەکگرتووەکانی ئەمریکا، کە پێشتر ڕایگەیاندبوو ئەگەر کەنەدا ئەو ڕێککەوتنە لەگەڵ چین واژۆ بکات، ئەوا واشنتن ڕسووماتی گومرگی بە ڕێژەی 100% دەخاتە سەر کاڵاکانی کەنەدا.
کۆمێنت (0)
تا ئێستا هیچ کۆمێنتێک نەکراوە.