دۆناڵد ترەمپ سەرۆكی ئەمەریكا ئەمڕۆ هەینی سەركەوتنی گەورەترین پڕۆسەی ئاڵوگۆڕی دیلەكانی نێوان رووسیا و ئۆكڕاینای راگەیاند كە ژمارەیان 1000 دیل بووە لە هەرلایەكیان.
ترەمپ لە تۆڕی كۆمەڵایەتی (تروس سۆشیال) بڵاوی كردەوە: گەورەترین پڕۆسەی ئاڵوگۆڕی دیلەكان لەنێوان رووسیا و ئۆكڕاینا بە سەركەوتوویی كۆتایی هات.
بڵاویشی كردەوە: پیرۆزبایی لە هەردوو لایەنی رووسیا و ئۆكڕاینا دەكەم لە سەركەوتنیان لەم پڕۆسە و رێككەوتنەدا.
چەند رۆژێك پێش ئێستا مۆسكۆ و كیێف لە دانوستانەكانیان لە ئەستەنبۆڵ رێككەوتبوون لەسەر ئاڵۆگۆڕی 1000 دیل لە هەر لایەكیان.
لەم مانگەدا ئەمە دووەم پڕۆسەی ئاڵوگۆڕی دیلەكانە لەنێوان رووسیا و ئۆكڕاینا كە چەند رۆژێك پێش ئێستا هەردوولا 205 دیلی دیكەیان لەنێوانیاندا ئاڵوگۆڕ كردبوو.
بڕیارە لە رۆژانی داهاتوو بە چاودێری راستەوخۆی ئەمەریكا، دانوستانی راستەوخۆ لەنێوان رووسیا و ئۆكڕاینا لە ڤاتیكان دەست پێ بكات بە مەبەستی كۆتاییهێنان بە جەنگی نێوان هەردوو وڵات.
کۆمێنت (0)
تا ئێستا هیچ کۆمێنتێک نەکراوە.