وەزارەتی پەروەردەی هەرێمی كوردستان بۆ یەكەمجار پلاتفۆڕمێكی نوێی فێربوونی دیجیتاڵی راگەیاند كە بریتییە لە پڕۆسەی فێربوونی قوتابییان لە رێگەی تەكنەلۆژیاوە و پلاتفۆڕمەكەش ساڵی داهاتوو بەردەست دەبێت.
وەزارەتی پەروەردە رایگەیاند "بۆ یەکەمجار کار لەسەر پلاتفۆرمێکی ناوازەی فێربوونی کارلێکەرانە Interactive دەکەین بۆ پۆلەکانی یەکەم و دووەم و سێیەمی بنەڕەتی کە لە ساڵی ئایندەی خوێندن بەردەست دەبێت".
راشیگەیاند " پلاتفۆڕمەكە كە ناوی (قوتابخانەکەم)ـە، قوتابخانەی دیجیتاڵی کارلێکەرانەی وەزارەتی پەروەردەی حکوومەتی هەرێمی کوردستانە".
هەروەها رایگەیاند "نەوەی ئەلفا لەگەڵ پێشکەوتنە بەرچاوەکانی بواری تەکنەلۆژیا لە دایکبوون و ژیان دەکەن، بە گرینگ زانراوە کە بۆ ئەو نەوەیە پرۆسەی فێربوون ئاوێزانی تەکنەلۆژیا بکرێت و لە هەمانکاتدا گونجاندنی بۆ بکرێت کە بتواندرێت رێگاکانی فێربوون ئاسان و چێژبەخش بکرێن".
وەزارەتی پەروەردە ئاماژەشی دا "تەکنەلۆژیا كە لە هەموو بوارەکان سوودی لێ وەردەگیرێت، گرینگە لە بواری پەروەردە و فێربوونیش سوودی لێ وەربگیرێت، ئەم هەوڵە بە هاوکاری هاوبەشەکانمان زیادبوونێکی جۆرییە بۆ هەوڵەکانی وەزارەتی پەروەردە بە ئاڕاستەی گۆڕانکاریی و وەرچەرخان.
جەختیشی كردەوە كە ئەم پلاتفۆڕمە لە هەمانکاتیشدا هاوکارێکی گرینگی قوتابی و خانەوادەکەشیان دەبێت بۆ دەستڕاگەیشتن بە پرۆسەیەکی پەروەردەیی و فێرکاری باشتر.
وێنە: پلاتفۆڕمی دیجیتاڵی قوتابخانەكەم
کۆمێنت (0)
تا ئێستا هیچ کۆمێنتێک نەکراوە.