ئاژانسی هه‌واڵی جیهانی (رۆیته‌رز ) له راپۆرتێكی مه‌یدانیدا بڵاویكردووه‌ته‌وه، خه‌ڵكی لادێكانی نزیك له كیێڤی پایته‌ختی ئۆكراینا به هیواوه له پڕۆسه‌ی وه‌ستانی جه‌نگی نێوان رووسیا و ئۆكراینا ده‌ڕوانن .
ئاژانسی رۆیته‌رز ئه‌وه‌شی خستووه‌ته‌ڕوو له گه‌شتێكی مه‌یدانیدا سه‌ردانی لادێكانی ئۆكراینیان كردووه و خه‌ڵكی لادێكانیان دواندووه ، ئه‌وان رایانگه‌یاندووه، جه‌نگی سێ ساڵه‌ی نێوان رووسیا و ئۆكراینا زۆر هیلاك و ماندووی كردوونه ، ناتوانن وه‌كو پێویست كشتوكاڵ بكه‌ن و ئاژه‌ڵ به‌خێو بكه‌ن ،كێشه‌ی كه‌می خواردن و دانه‌وێڵه‌یان هه‌یه‌و كه‌سیش لایان لێناكاته‌وه .
هاوڵاتیانی لادێكانی ئۆكراین راشیانگه‌یاندووه ،له‌به‌ر سه‌رمای تووند و خراپی ڕێگاوبانه‌كان ناتوانن وه‌كو پێویست بچن بۆ شار بۆ ده‌ستكه‌وتنی خواردن، جگه له‌وه به‌رده‌وام به ترس و نیگه‌رانییوه شه‌و ورۆژ به‌ڕێ ده‌كه‌ن له ترسی بۆردوومانی له‌ناكاوی سوپای رووسیا بۆ سه‌ر شار و لادێكانیان ،هیوای ئه‌وه‌شیان خواستووه كه پڕۆسه‌ی دانوستانی نێوان رووسیا و ئه‌مه‌ریكا له‌باره‌ی وه‌ستانی شه‌ڕی ئۆكراین ئاكام و ئه‌نجامی باشی هه‌بێت .
جێی باسه دوای سێ ساڵ له به‌رده‌وامی جه‌نگی نێوان رووسیا و ئۆكراین یه‌كه‌مجاره گه‌ڕێكی دانوستان له‌نێوان رووسیا و ئه‌مه‌ریكا به‌ڕێوه بچێت له ریازی پایته‌ختی سعودیه ،چاوی هه‌موو دونیاش له‌سه‌ر ئه‌وه‌یه كه كۆبوونه‌وه‌كان له‌باره‌ی وه‌ستانی شه‌ڕ و هێنانه‌كایه‌ی ئاشتی له‌نێوان رووسیا و ئۆكراینا ئه‌نجامی ئه‌رێنی باشی لێبكه‌وێته‌وه .
کۆمێنت (0)
تا ئێستا هیچ کۆمێنتێک نەکراوە.