فەرماندەی گشتیی دەستەی تەحریری شام بەفەرمی داوای لە رووسیا كردووە بەشار ئەسەد سەرۆكی پێشووی سووریا رادەست بكەنەوە.
ئاژانسی (رۆیتەرز) لەسەر زاری بەرپرسێكی رووسیا بڵاوی كردۆتەوە: لە كۆبوونەوەی نێوان ئەحمەد شەرع فەرماندەی گشتیی دەستەی تەحریری شام و میخائیل بوجدانۆف جێگری وەزیری دەرەوەی رووسیا كە چەند رۆژێك پێش ئێستا لە دیمەشق ئەنجامدرابوو، داواكرابوو بەشار ئەسەد سەرۆكی پێشووی سووریا رادەستی حكوومەتی نوێ بكرێتەوە.
بڵاویشی كردەوە: لە كۆبوونەوەكەدا رووسیا داواكەی رەتكردبووەوە، هەروەها بڕیاردرابوو گفتوگۆكانی نێوان دەسەڵاتدارانی نوێی سووریا و حكوومەتی رووسیا بەردەوام بێت.
لای خۆشییەوە دیمتری بیسكۆف گوتەبێژی كۆشكی سەرۆكایەتی رووسیا (كرملین) ئەمڕۆ چوارشەممە لە كۆنگرەیەكی رۆژنامەوانیدا رەتی كردبووەوە باسی داواكاری رادەستكردنەوەی بەشار ئەسەد لەلایەن حكوومەتی نوێی سووریا بكات. جەختیشی كردبووەوە كە ئەم بابەتە لە كاتی ئێستادا جێگەی گفتوگۆ نییە.
كۆشكی كرملین ئاماژەی بەوەش دا كە رووسیا خوازیارە پەیوەندییەكی باش لەگەڵ حكوومەتی نوێی دیمەشق بنیات بنێت.
بەشار ئەسەد سەرۆكی پێشووی سووریا لە دوای سەركەوتنی شۆڕش و كەوتنی دیمەشق، چووەتە رووسیا و ئێستا لەگەڵ خێزان و منداڵەكانی لەو وڵاتە مافی پەنابەرێتییان پێ دراوە.
کۆمێنت (0)
تا ئێستا هیچ کۆمێنتێک نەکراوە.