نرخی زێڕ لەدوای کردنەوەی بازاڕەکانی ئاسیا، بۆ کەمترین ئاستی خۆی لە ماوەی سێ هەفتەی رابردوودا دابەزی. لەدوای سەرکەوتنی دۆناڵد ترەمپ لە هەڵبژاردنی سەرۆکایەتیی ئەمریکا، بەهای دۆلاری ئەمریکی بەرزبووەوە و ئەوەش بە نەرێنی کاریگەری لەسەر نرخی زێڕ داناوە، بەشێوەیەک کە نرخی یەک ئۆنسە زێڕ لە بەرەبەیانی ئەمڕۆ پێنجشەممە دابەزی بۆ 2656 دۆلار.
ئەمەش لە کاتێکدایە کە هەفتەی رابردوو نرخی کانزای زەرد بۆ دووهەزار و حەوتسەد و نەوەد دۆلار بەرزبووەوە، کە بەرزترین ئاستی بوو لە مێژوودا، لەو کاتەشەوە نرخی زێڕ سەد و سی دۆلار لە بەهای خۆی لەدەستداوە.
جێی ئاماژەپێکردنە کە گەڕانەوەی ترەمپ بۆ کۆشکی سپی، گومانی دروستکردووە ئایا بانکی ناوەندیی ئەمریکا لە کۆبوونەوەی ئەمڕۆی خۆیدا بەردەوام دەبێت لە دابەزاندنی سوودی بانکی یان پاشگەزدەبێتەوە، شرۆڤەکارانی سەر بە کۆمپانیا ڕاوێژکارییەکانی ئەمەریکاش پێیانوایە کە سیاسەتە ئابوورییەکانی ترەمپ وا لە بانکی ناوەندی دەکات سوودی بانکی کەمتر بکاتەوە.
کۆمێنت (0)
تا ئێستا هیچ کۆمێنتێک نەکراوە.