وەزیری دارایی و ئابووری حکوومەتی هەرێمی کوردستان هۆشداری دەداتە بانکە بازرگانییەکانی سلێمانی و چه‌مچه‌ماڵ و هەڵەبجە و بانكه‌كانی ناوچه‌كه كه ڕایگه‌یاندووه، هەر کەسێک ئاستەنگ و رێگری بۆ جێبەجێکردنی پرۆسەی هەژماری من دروست بکات، دووچاری لێپرسینەوە دەبێت.
بەپێی نووسراوێکی وەزیری دارایی و ئابووری حکوومەتی هەرێمی کوردستان بە ژمارە 390 کە لە رۆژی 28ی10ی2024 بە واژۆی ئاوات شێخ جەناب، وەزیری دارایی و ئابووری دەرچووە و ئاراستەی بانکە بازرگانییەکانی مەڵکەندی، توی مەلیک، تانجەڕۆ، هەڵەبجە و چەمچەماڵ کراوە، داوایان لێکراوە پابەند بن بە جێبەجێکردنی پرۆژەی هەژماری من.
لە نووسراوەکەدا ئاماژه به‌وه‌ش كراوه، هەر بەڕێوەبەر و فەرمانبەرێک لەو بانکانەی تایبەتکراون بۆ جێبەجێکردنی پرۆژەکە، رێگری و ئاستەنگ بۆ کارمەندانی هەژماری من دروست بکات، دووچاری لێپرسینەوە دەبێت.
دەقی نووسراو:
بۆ بەڕێوەبەرایەتیی گشتیی بانكە بازرگانییەكان/ بانكەكانی (مەڵكەندی/ توی مەلیك/ تانجەڕۆ/ هەڵەبجە و چەمچەماڵ).
بابەت گشتاندن
ئاماژە بە نووسراوی سەرۆكایەتیی ئەنجوومەنی وەزیران، ژمارە (5171)، لە (27/10/2024)، پڕۆژەی (هەژماری من) پرۆژەیەكی سەرتاسەریی حكوومەتی هەرێمی كوردستانە و لەلایەن سەرۆكایەتیی ئەنجوومەنی وەزیرانەوە پەسەند كراوە، پێویستە وەكوو خۆی لە سەرجەم پارێزگاكانی كوردستان جێبەجێ بكرێ، هەر بەڕێوەبەر و فەرمانبەرێك لەو بانكانەی كە تایبەت كراون بۆ جێبەجێكردنی پڕۆژەكە، ڕێگری و ئاستەنگ بۆ كارمەندانی هەژماری من دروست بكا، دووچاری لێپرسینەوە دەبێتەوە و پاڵپشت بە هەردوو مادەی (4 و 5) لە یاسای بەرزەفتكردنی فەرمانبەری دەوڵەمەند و كەرتی گشتیی ژمارە (14)ی ساڵی (1991)، ڕێكاری یاسایی و كارگێڕییان بەرانبەر دەگیرێتە بەر.
کۆمێنت (0)
تا ئێستا هیچ کۆمێنتێک نەکراوە.