سەرلەئێوارەی ئەمڕۆ چوارشەممە هێرشێكی چەكداری كرایە سەر دامەزراوەی پیشەسازی فڕۆكەوانی و ئاسمانی (تووساش) لە ناوچەی كەهرەمان كازان لە نزیك ئەنقەرەی پایتەختی توركیا و بەهۆیەوە كوژراو و برینداری لێ كەوتەوە.
هێرشەكە لەلایەن دوو چەكدار كە ئافرەتێك و پیاوێك بوون ئەنجامدراوە، دوو چەكدارەكە بە ئۆتۆمبێلێكی تەكسی گەیشتوونەتە بەردەم دامەزراوەی پیشەسازی فڕۆكەوانی و ئاسمانی و راستەوخۆ دەستیان بە تەقەكردن كردووە.
وەك لە گرتە ڤیدیۆی چاودێریی دامەزراوەكەدا دەردەكەوێت، هەردوو چەكدارەكە هەر لەنێو گەراجی ئۆتۆمبێل دەست بە تەقەكردن دەكەن و دوو لە پاسەوانەكانی دامەزراوەكە دەكوژن و دەچنە نێو هۆڵی پێشوازییەوە.
بەگوێرەی ئەو زانیارییانەی میدیاكانی توركیا بڵاویان كردۆتەوە، هەردوو چەكدارەكە لە كاتی هێرشەكەدا خۆیان تەقاندۆتەوە.
عەلی یەرلیكایا وەزیری ناوخۆی توركیا رایگەیاند: بە كوژرانی هەردوو چەكدارەكە، كۆتایی بە هێرشەكەی ئەمڕۆی ئەنقەرە هاتووە.
لەبارەی ژمارەی قوربانییەكان، رەجەب تەیب ئەردۆغان سەرۆك كۆماری توركیا كە ئێستا بۆ بەشداریكردن لە لووتكەی (BRICS) لە رووسیایە، رایگەیاند: لە ئەنجامی هێرشەكەدا چوار كەس كوژراون.
جگە لە كوژراوەكان، 14 كەسی دیكەش بەهۆی هێرشەكە بریندار بوون كە دۆخی تەندروستی 3 لە بریندارەكان لە مەترسیدایە.
سەبارەت بە ناسنامەی چەكدارەكان، وەزیری ناوخۆی توركیا ئاماژەی بەوە دا كە لایەنە پەیوەندارەكان دەستیان بە لێكۆڵینەوە كردووە بۆ ئاشكراكردنی ناسنامەی هێرشكارەكان و ئەو لایەنەی لە پشتیانەوە بوونە، دواتریش بۆ رای گشتی بڵاو دەكەنەوە.
ڤیدیۆ.. ساتی یەكەمی ئەنجامدانی هێرشەكە:-
کۆمێنت (0)
تا ئێستا هیچ کۆمێنتێک نەکراوە.