جه‌مالی ده‌لاك...
ئەگەر بگەڕێینەوە بۆ ناوەڕاستی ساڵەكانی سەدەی پێشوو، ئاوڕێك لە بواری هونەری گۆرانی و مۆسیقا بدەینەوە، دەبینین كۆمەڵێك كەسایەتی بەهرەمەند و دەنگخۆش و هونەرمەند و ژەنیار و ئاوازدانەر لە كوردستان و شاری سلێمانی سەریان هەڵداوە، بە هەوڵ و كۆشش و ته‌قه‌ڵاى بێوچانيان بوونەتە بەشێكی گرینگ لە مێژووی مۆسيقا و گۆرانى كوردى.
شاری سلێمانی لە سەرەتای سەدەی پێشووەوە خاوەنی تیپی مۆسیقا بووە، لەگەڵ ڕەوتی گەشەكردنی سلێمانی لە هەموو بوارەكاندا، بواری هونەری مۆسیقا و گۆرانی لە پێشكەوتنی سلێمانیدا ڕۆڵی بەرچاو و كاریگەرییان هەبووە، هونەرمەندانی دەنگخۆش و میوزیكژەنانی شاری سلێمانی هەریەكەیان بە هونەرەكەیان مێژووییەكیان تۆماركردووە و بەردی بناخەی پێشكەوتنی ئەو شارەیان پتەوتر كردووە، ئەوەی جێگەی خۆشحاڵی و سەرفرازییە هونەری ئەو هونەرمەندانە بە گشتی لە شاری سلێمانیدا قەتیس نەماون و بەڵكو هونەرەكەیان سنووری بەزاندووە و بە تەواوی كوردستاندا بڵاوبوونەتەوە.
لەبواری هونەرمەندانی ژەنیاردا باسی لێوە بكەین خاوەنی ئەم كەلە هونەرمەندانەیە كە بەدەست و پەنجە زێڕینەكانیان خزمەتێكی گه‌وره‌يان بە هونەری نەتەوەكەمان كردووە و بۆ هەمیشە دەبێت شانازیان پێوە بكەین، كە نموونەكانیان زۆرن وه‌ك:
(یولیەم یوحەننا، قادر دیلان، شەوكەت ڕەشید، حاتەم سەعید، نەجاتی عەبدە، ئەنوەر قەرەداخی، خالید سەركار، نامدار قەرەداخی، سەلاح ڕەئووف، عەلی ڕەزا، حەمەسەعید عەبدوڵا، سه‌لاح ڕه‌شيد، به‌هجه‌ت ڕه‌شيد سه‌عاتچى، هادى عه‌نبه‌ر، عوسمان سابوونچى، سه‌ردار ڕه‌مزى و دكتۆر ئومێد مه‌دحه‌ت موباره‌ك .......تاد).
هەروەها لە بواری هونەری دەنگخۆشی و گۆرانیبێژیشدا بێگومان شاری سلێمانی هەژار نییە، بەڵكو چەندین گۆرانیبێژ و دەنگخۆشی تێدا هەڵكەوتووە، گەنجینەیەكی پڕبەهای هونەرییان لەپاش خۆیان جێهێشتووە، نموونەی ئەو هونەرمەندانە وەك (ئەحەی ناسر، ڕەشۆڵ، حەمە ساڵح دیلان، ڕەفیق چالاك، مه‌حمووى حه‌مه‌ى له‌يلێ، مەحمووی تۆفیق شلك، قادری حاجی حسێن، حه‌مه‌ى به‌كر، عوسمان سابوونچی، جه‌مال جه‌لال، شەماڵ سائیب، ئەحمەد شەماڵ و عوسمانى خاڵه حسه، ئيبراهيم محه‌مه‌د، تاليب مه‌جيد (ته‌له)، عوسمان شارباژێڕى و عومەر ڕەزا.........تاد).
لەگەڵ هەوڵ و تێكۆشانه هونه‌رییه‌كانی هونەرمەندانی ئەو شارە، نابێت ڕۆلی ئێزگەی كوردی بەغدا فەرامۆش بكەین، كە دەنگی هونەرمەندانی كوردى بەگشتی لە ڕێگەی ئەو ئێزگەیەوە دەدرا بە گوێی بیسەرانی ئەو ڕادیۆیە، یەكێك لەو هونەرمەندانەی كە لە ڕێگەی ڕادیۆی كوردی بەغداوە گۆرانییەكانی تۆمار دەكرد و بڵاو دەبوونەوە، بەدەنگێكی خۆش و ناسك گۆرانی دەچڕی و گۆرانییەكانی ببوون بە گۆرانی ڕۆژ و له‌سه‌ر زارى خه‌ڵك بوون و به كۆرس ده‌وترايه‌وه ئه‌ويش گۆرانى.....
(یەکەم کەسم بوو کە تۆم ناسی بەقوربان
بەجارێك خستمە ناو دەستت دڵ و گیان
بەم جۆرە بوویتە سا خاکـــــــم بەدامــان
وا من ئەڕۆم هەر تۆیی دوایی پەشیمان
بمبوورە ئەمجــارە دوا جــــــارە هاتـــــــم
هاتــــم هاتــــم بەســەر بەستی هاتم)
كاتێك گوێ بیستی گۆرانییەكانی (هاتم هاتم و پەڵپ و بیانووم پێ مەگرە) دەبێت، ڕاستەوخۆ هونەرمەند (عومەر ڕەزا) لە دەرگای بیر و هۆشمان دەدا، هونەرەكەی دەمانگێڕێتەوە بۆ ناوەڕاست و دەیەی كۆتایی سەدەی بیست، دەنگێكی ناسك و خۆش و ئاواز و تێكستی سادە كە بەزوویی ببوونە وێردی سەرزاری كۆمەڵانی خەڵكی كوردستان.
هونەرمەند عومەر ڕەزا هونەرمەندێكی جوان و هەستناسكی شاری سلێمانی دوای تۆماركردنی ئەو چەند بەرهەمە، زۆر بەداخەوە لە هونەری گۆرانیبێژی دوور كەوتەوە، ئەویش بەهۆی هەژاری و نەبوونی هاوكاری و دەستگیرۆیی هونەری، ئێستاش كە لە ژیاندایەوە و باری تەندروستی لەبار و جێگير نييه.
بیبلۆگرافیای هونەرمەند عومەر ڕەزا :-
عومەر حەمە ڕەزا شەریف ناسراو بە عومەر ڕەزا، لە شاری هەڵمەت و قوربانی لە گەڕەكی چوارباخ لەساڵی (1942) لە خێزانێكی كرێكار و زەحمەتكێش و نەدار لەدایكبووە، بەڵام عومەرى به‌هره‌مه‌ند نەیتوانیوە تەمەنی منداڵی به‌چێژ و خۆشی لە سلێمانی بەسەر بەرێت، بەهۆی ئەو بارودۆخە ناهەمووارەی دوای جەنگی جیهانی دووەم كە نەهامەتی و قات و قڕی كە بەسەر جیهاندا باڵی كێشا و خانه‌وادەی ئەو هونەرمەندەش كەوتنەبەر شەپۆڵی ئەو بەدبەختی و نه‌داری و نەبوونییەوە، باوكی لەپێناو دابینكردنی نان و ژیان بۆ خۆی و خێزان و منداڵەكانی، ڕوو دەكاتە شاری هەڵەبجە، ئەو شارەی بە شاری شاعیران و هونەرمەندان و ڕووناكبیران و ڕۆشنبيران ناسراوە، لەوێ درێژە بەژیان دەدەن.
عومەر ڕەزا لە هەڵەبجە دەچێتە قوتابخانە، لە قوتابخانەی هەڵەبجەی سەرەتایی دەخرێتە بەر خوێندن و فێربوونی ئەلف و بێی كوردی، بەڵام لەو قوتابخانەیە عومەر ڕەزا بەهرەی دەنگخۆشی تێدا بەدی دەكرێت و ده‌رگاى ده‌ركه‌وتن و هه‌نگاونان بۆ دنياى هونه‌رى لێ ده‌كرێته‌وه، ئەویش بەهۆی مامۆستای ئەدیب و شاعير و هونەرمەند( ع،ع، شەونم، 1925_10/10/2020 هه‌ڵه‌بجه).
مامۆستا ع،ع، شەونم كە سەرپەرشتیاری تیپی سروودی قوتابخانەی هەڵەبجە بووە، بەهەست و سۆزى هونەرییانەی خۆی دركی بە بەهرەی دەنگخۆشی عومەر ڕەزا كردووە، هەوڵی لەگەڵ داوە و لە تیپی سروودی قوتابخانەی هەڵەبجە دايناوه، بەیانیان عومەر ڕەزا لەگەڵ هاوڕێ قوتابییەكانی بە دەنگێكی خۆش سرووده نیشتمانی و نه‌ته‌وه‌ییه‌كانی گەلەكەمانی خوێندووە، وەك (خۆشم ئەوێ وڵاتەكەم، ئەی ڕەقیب، ئەی دلێران، خوایە وەتەن ئاواكەی، .....تاد).
ئەو بەردەوامییەی عومەر ڕەزا لەناو تیپی سروودی قوتابخانەی هەڵەبجە زیاتر مامۆستا عەلی شەونمی هانداوە كە گرینگی و بايه‌خى زیاتری پێ بدات، تا ئەو جێگەیه‌ی مامۆستا ع،ع، شه‌ونم بير له‌وه ده‌كاته‌وه كه دوو گۆرانی بۆ عومەر ڕەزا ئامادە بكات لە هەڵبەست و ئاوازی مامۆستا خۆی بووە، داویەتی بە عومەر ڕەزا تا بيانخوێنێ، گۆرانییەكانیش بریتی بوون لە (هاتم هاتم، پەڵپ و بیانووم پێ مەگرە) ئەو گۆرانییانە دەكه‌ونە سەر زاری هاوڕێكانی و جێگەی خۆشی و ستايش و داخوازی خەڵكی دەبن.
بەمشێوەیە عومەر ڕەزا بەردەوام دەبێت لە خوێندن و ژیان لە شاری هەڵەبجە، تا ساڵی 1957 بە ماڵەوە دەگەڕێنەوە شاری سلێمانی و هەڵەبجە بەجێدێڵن، بەڵام ئەمجارە لە گەڕەكی سەرچیمەنی شاری سلێمانی نیشتەجێ دەبن.
ئەو گەڕانەوەیە بۆ عومەر دەبێتە هۆی دەستبەرداربوونی لە خوێندن بەهۆی سەختی ژیان و ناچار لەگەڵ باوكیدا شان دەداتە بەر كرێكاری و دەبێتە كرێكار لە دروستكردنی كارگەی جگەرەی سلێمانی، لەگەڵ ناڕەحەتی ژیان و ئەو ئەركە گرانەی سەرشانی، بەڵام دەستبەرداری هونەری گۆرانی گوتن نابێت و هەمیشە لە خەمی ئەوەدا دەبێت كە گەشە بە هونەری گۆرانی گوتن بدات.
لە ساڵی 1958 عومەر ڕەزا ڕوو دەكاتە شاری بەغدا و لەوێ بەڕێكەوت (خەلیل عەبدوڵا و ئەحمەدی شێخاڵی و هونەرمەند شەماڵ سائیب) كه ئه‌و كاته هه‌رسێكيان له‌ڕاديۆى كوردى به‌غدا ده‌بن، دەبینێ و زۆر خۆشحاڵ دەبێت بە دیتنی ئەو كەسایەتییانە، دوای باس و خواسی هونەری داوای گۆرانی لێ دەكەن و عومەر ڕەزاش گۆرانیان بۆ دەچڕێ، زۆر سەرسام دەبن بە دەنگی و بڕیار دەدەن لەگەڵ خۆیان بیبەن بۆ ئێزگەی كوردی.
كاتێك هونه‌رمه‌ند عومه‌ر ڕه‌زا دەبەنە ئێزگە دواى تاقيكردنه‌وه‌ى ده‌نگى، وەری دەگرن و ناوی دەنووسن بە (عومەر ڕەزا) ناوی (حەمە)كەی لێ دەكەنەوە، له‌و كاته‌وه به عومه‌ر ڕه‌زا ده‌ناسرێت و ناوبانگ په‌يدا ده‌كات.
لەئێزگەی كوردی بەغدا ئەو دوو گۆرانییەی كە مامۆستا (ع،ع، شەونم) لە شاری هەڵەبجە بۆی ئامادەكردبوو، لەوێ لەگەڵ تیپی مۆسیقاى ڕادیۆ بە میوزیكەوە دەیانخوێنێ.
هونەرمەند عومەر ڕەزا دەڵێت: من خۆم هەستم بەو بەهرەی دەنگخۆشییە نە دەكرد كە لە مندا هەیە، بەڵام مامۆستای گەورە و پیرۆزم ع،ع، شەونم ئەو بەهرە هونەرییەی لەمندا بەدی كرد و ئەو گۆرانییانەی بۆ دانام، بەڵام كاتێك چوومە بەغدا و لەئێزگە ئەو گۆرانییانەم بە میوزیكەوە خوێند، تام و چێژێكی زۆری هەبوو، هەستم بەخۆشی و دونیایەكی گەورە دەكرد و لە خۆشیدا گەشكە ئەیگرتم) (*1).
دوای تۆماركردنی ئەو گۆرانیانە و بڵاوبوونەوەیان لە ڕێگەی ئێزگەی كوردی بەغداوە، دەبێتە جێگەی خۆشحاڵی خەڵك و زیاتر بووە هۆی ناساندنی عومەر ڕەزا لەنێو خەڵكیدا و بەهۆی ئەو ڕادیۆیەوە دەنگی عومەر ڕەزا سنووری بەزاندوو لە ڕۆژهەڵاتی كوردستانیش ناو و ناوبانگ په‌یدا ده‌كات و ده‌ناسرێت.
ئەو سەردەمە له شاره‌كانى كوردستان گۆرانییەكانی عومەر ڕەزا ڕۆژ بە ڕۆژ لەنێو جەماوەردا دەنگی دەدایە و خەڵكی پێی ئاشنا دەبوون، لە هەمانكاتدا تیپی مۆسيقاى مەولەوی بەسەرپەرشتی هونەرمەندی گەورە (قادر دیلان 1928_18/3/1999) كارە هونەرییەكانیان ئەنجام دەدا، هەروەها هەردوو هونەرمەند لە یەك گەڕەكدا دەبن و هاوسێی یەكتریش دەبن، واته قادر ديلان و عومه‌ر ڕه‌زا، هونەرمەند قادر دیلان عومەر ڕەزا دەبات بۆ تیپی مۆسيقاى مەولەوی، لەوێ به هونه‌رمه‌ندانی تیپی مۆسیقای مه‌وله‌وی دەناسێنێ وەك (ولیەم یوحەننا، نەجاتی عەبدە (نای ژەن)، حازم حەداد (عوود ژەن)، هادی عەنبەر (كەمانچە ژەن)، حاتەم سەعید (ئیقاع)، بەهجەتی سەعاتچی و خاڵە حەمەفەرج و چەند كەسایەتییەكی تر وەك لەتیف حەمدی) ( یادیان بەخێر).
هەرچەندە هونەر بە گشتی لەو سەردەمەدا جێگەی بایەخ نەبووه لەناو كۆمەڵگادا، بەڵكو لەلای هەندێك خێزان و بنەماڵەی ئەو شارە پەسەند نەبوو بەڵكو بەكەمیش سەیر دەكرا و ڕه‌خنه و تانه و ته‌شه‌ریان له هونه‌رمه‌ندان ده‌دا، بەڵام ئەو هونەرمەندە بەڕێزانە توانیان بە هەموو شێوەیەك خزمەتی ڕاستەقینەی هونەری كوردی بكەن و بناخەیەك بۆ میوزیك و گۆرانی كوردی دابڕێژن.
دوای ئەوەی هونەرمەند عومەر ڕەزا بە تیپی مۆسيقاى مەولەوی ئاشنا دەبێت و دەكەوێتە كاركردن لەگەڵیاندا، ئەو تێكەڵاوبوونە دەبێتە هۆی هه‌وێنى تۆماركردنی چەند گۆرانییەك وەك گۆرانی:
(لەیارەوە) لە هۆنراوەی شاعیری گەورە (ئەحمەد هەردی 1922_29/10/2006)یە، هونەرمەند قادر دیلان ئاوازی بۆ دادەنێت، پاشان گۆرانی (دیاری) كە هونەرمەند نەجاتی عەبدە بۆی ئامادەكردووە، هەروەها مامۆستای گەورە (ولیەم یوحەننا 1934_14/9/2005) گۆرانی (گوڵاڵەی ژیان)ی بۆ ئامادە دەكات، بەو گۆرانییانە عومەر ڕەزا زیاتر ناوبانگی دەركرد و ناسرا.
یەكێك لە كارە گرینگەكانی تیپی مۆسيقاى مەولەوی كە بەرامبەر هونەرمەند عومەر ڕەزا ئەنجامیان داوە و خودی هونەرمەندیش هەمیشە سوپاسگوزاری ئەو كارە باشەیە كه له‌گه‌ڵيياندا كردووه، كە تیپی ناوبراو توانیویانە عومەر ڕەزا وەك فەرمانبەر لە فەرمانگەی دارستانی سلێمانی (دائرە غابات) وەك چاودێر دای بمەزرێنن.
لە ساڵی 1959 لەلایەن ئێزگەی كوردی بەغداوە بانگهێشت دەكرێت، بۆ مەبەستی بەشداریكرنی لە ئاهەنگی یادی شۆڕشی 14ی تەمموز ، لە هۆڵی ئوتێلی بەغداد كە چەندین كەسایەتی نیشتمانپەروەری كورد و عەرەب و (عه‌بدولكه‌ریم قاسم 1914_8/2/1963) ئامادەی ئەو ئاهەنگە بوون.
هونەرمەند عومەر ڕەزا لە هەمان ساڵدا لەئێزگەی كوردی بەغدا بە هاوكاری هونەرمەند (شەماڵ سائیب 1931_7/11/1986) چەند گۆرانییەكی تر ئەخوێنێ، گۆرانی (بۆ تۆیە دڵ بۆ تۆیە و تاكەی تاكەی) كە لە ئاواز و هەڵبەستی شەماڵ سائیب بوون.
سەبارەت بەو گۆرانییانە و هاوڕێیەتی و دۆستایەتی لەگەڵ شەماڵ سائیب، عومەر ڕەزا بەمشێوەیە دەدوێت :
هەر لە ساڵی 1959 بوو، ڕۆژێك شەماڵ سائیب بانگی كردم و گوتی وەرە دوو دیاری چاكم بۆ ئامادەكردوویت، بەخوێندنی ئەو گۆرانییانە دەبیت بە (فەرید ئەتڕەش 1910_1974) (ئەو كاتە فەرید ئەتڕەش یەكێك بوو لە هونەرمەندە گەورەكانی عەرەب و كاریگەری لەسەر هونەرمەندانی كورد بەتایبەت شەماڵ سائیب دانابوو)، منیش گوتم دەستەكانت ماچ دەكەم كاكە شەماڵ، هەر بۆیە كاكە شەماڵ بە عوودەكەی خۆی لە ئێزگە سووكە پرۆڤەیەكی پێ كردم، شەماڵ گوتی بڕۆ بەخوا خۆیەتی..! سبەینێ عەسر وەرە با بە كوێرەكانی لەبەر بكەم و تەسجیلی كەین، مەبەستی كوێرەكان، گرووپە میوزیکژەنەكانی ڕادیۆی كوردی بەغدا بوو)، ئەوەبوو لە كاتی دیاریكراودا كە هونەرمەند شەماڵ سائیب داینابوو، ئەو دوو گۆرانیيە تۆمار كرا و و بڵاوكرایەوە، دەنگی دایە و سەركەوتنێكی گەورە بوو بۆ من)(*2).
دوای ماوەیەك هەردوو گۆرانی (ئەرێ لەیلێ و بۆتۆیە دڵ) هونەرمەند شەماڵ سائیب بەدەنگی خۆی تۆماری كردوونەتەوە.
لە ساڵی 1961 مامۆستای هونەرمەند لەتیف حەمدی چەند ئاوازێكی بەتێكستی باش و سەركەوتوو بۆ عومەر ڕەزا ئامادە دەكات وەك گۆرانی (یاری چاوكاڵ و گۆرانی ئەڵێم وەك ساماڵ)، ئەو گۆرانییانەش دەچنە سەر خەرمانی هونەری عومەر ڕەزا و زیاتر ناوبانگ لەنێوەندی هونەریدا پەیدا دەكات.
بڵاوبوونەوەی ئەو بەرهەمانە و زیاتر ئاشنابوونی دەنگی عومەر ڕەزا لەنێو خەڵكیدا بووە هۆی ئەوەی لەلایەن كۆمپانیای (چەقماقچی) داوا لە عومەر ڕەزا بكرێت كە گۆرانی (هاتم هاتم) لەسەر قەوان تۆمار بكات، بەڵام بەشێوازێكی نوێ و كۆرسی كچانی لەگەڵدا دەبێت، ئەو كارە بۆ ئەو سەردەمە زۆر دەگمەن بووە، لەبەرامبەر تۆماركردنی ئەو گۆرانییە لەسەر قەوان كۆمپانیای چەقماقچی بڕی (200) دیناری ئەو سەردەمەی وەك پاداشت پێ ده‌ده‌ن.
لە ناوەڕاستی سەدەی پێشوو هاوشانی كاری هونەری میوزیك و گۆرانی، كاری هونەری نواندن و شانۆ لە برەودا دەبێت و كۆمەڵێك هونەرمەندی بەتوانا كۆمەڵێك كاری باشیان ئەنجامداوە ، لەنێوان ساڵەكانی (1960 بۆ 1961) شانۆگەری و ئاهەنگی گۆرانی و میوزیك بەیەكەوە پێشكەش كراون، عومەر ڕەزا وەك هونەرمەندێكی گۆرانیبێژ لەگەڵ تیپی مۆسيقاى مەولەوی لە چەندین ئاهەنگدا لە شانۆگەری (بەرەو دوا)، (مەم و زین) و (پیسكەی تەڕپیر) بەشداری كردووە، لەو شانۆگەرییانەدا هونەرمەندی شانۆكار و دەنگخۆش مامۆستا (ڕەفیق چالاك 1923_30/11/1973) ڕۆڵی گرینگ و بەرچاوی هەبووە، لەگەڵ چەندین هونەرمەندی تری شاری سلێمانی لە بواری شانۆدا.
هونەرمەند عومەر ڕەزا بە یەكێك لە گۆرانیبێژانی ئێزگەی كوردی بەغدا دێتە ئەژماركردن، كەسایەتییەكی بێدەنگ و هونه‌رێكى كه‌موێنه له ڕووى تۆنى ده‌نگ و ئه‌داى گۆرانييه‌وه، هونەرمەندێكی هەست ناسك و خۆشەویستی نێو هاوەڵەكانی دەبێت، پەیوەندییەكی پتەو و خۆشی لەگەڵ هونەرمەندانی ئێزگەی كوردی بەغدا دەبێت، وەك (مامۆستا عەلی مەردان، تایەر تۆفیق، باكووری، ڕەسوول گەردی، شەماڵ سائیب، محەمەد عارف جزیری و حەسەن جزیری و جەلال كۆچەر....تاد).
دوای تۆماركردنی ئەو بەرهەمانە، بەهۆی پێكهێنانى خێزان و بوونی منداڵ و قورسبوونی ئەركەكانی سەرشانی و بەهۆی كەمدەرامەتییەوە ئەو هونەرمەندە لە هونەری گۆرانیبێژی دوور دەكەوێتەوە، نەبوونی و سەختی ژیان تەنگی پێهەڵدەچنێ.
لە ساڵی 1984 لەسەر داخوازی تەلەفزیۆنی كەركووك هەموو گۆرانییەكانی هونەرمەند بەشێوەی (پلەی باگ) بۆی تۆمار دەكەنەوە، ئیتر عومەر ڕەزا ڕۆژ بەڕۆژ لە هونەری گۆرانیبێژی دوور دەكەوێتەوە، درێژە بەژیان دەدات تا راپەڕینە مەزنەكەی ساڵی 1991 وەكو هەر تاكێكی كۆمه‌ڵی كورده‌واری خراپی و دژوارييه‌كانى ژیان زیاتر بەرۆكی پێ دەگرن و خەم و كەسەری لەدەستدانی هاوسەری ئەوەش بۆ عومەر ڕەزا خەم و داڕووخانێكی تر دەبێت.
عومەر ڕەزا وەک کارمەندى خزمەتگوزار لە دیوانی پارێزگای سلێمانی دەستبەکار دەبێت، هونەرمەند بەمشێوەیە باس لە پارێزگاری ئەو كاتەی شاری سلێمانی بەڕێز سالار عەزیز دەكات كە شێوازی مامەڵكردنی لەگەڵ عومەر ڕەزا بە چ شێوەیەك بووە:
(هیچ كات دڵسۆزی و هەستی پاك و بێگەردی و مرۆڤدۆستی كاكە سالار عەزیز لەیاد ناكەم، چونكە ئەو كاتە من فەڕاش بووم زۆر بێ دەرەتان بووم، ئەو بەڕێزە وەك هاوەڵێكی ساكار و سادەی دێرینی خۆی دەست لەملانم دەبوو، هەمیشە هەڵگری خەمەكانم بوو، دڵنەوایی دەكردم و قسەی خۆشی بۆ دەكردم بۆ ئەوەی خەمەكانم بڕەوێتەوە، بەردەوام هاوكاری ماڵی دەكردم و هیچ كات فەرامۆشی نەدەكردم، هەموو كات چاكە و پیاوەتی ئەو مرۆڤ دۆستەم لەیادە، بە هاوكاری كاكە سالار عەزیز یارمەتی بەڕێز مام جەلال بۆ هونەرمەندان بۆم بڕایەوە و هەموو مانگ وەرم دەگرت)(*3).
به‌پێى ياساى شارستانى هونەرمەند عومەر ڕەزا خانەشین ده‌كرێـت، به‌ڵام به‌داخه‌وه باری تەندروستی ڕۆژ بەڕۆژ ڕوو لە خراپییە و مووچەی ڕێزلێنانه‌كه‌شى لێ ده‌بڕێت لەبەر ئەوەی كە مووچەی خانەنشینی وەردەگرێت، ئایا ئەو مووچەی خانەنشینەی كە وەری دەگرێت تۆ بڵێی بەشی ژیانی بكات، ئێستا ئەو هونەرمەندە لەژیاندایە و باری تەندروستی باش نییە و داواكارم لە سەندیكای هونەرمەندان و لايه‌نى په‌يوه‌نديدار، ئاوڕێك لەو هونەرمەندە بدەنەوە كە ڕۆژانێك بوو خزمەتێكی گەورەی بە هونەری میوزیك و گۆرانی نەتەوەكەمان كردووە و شادى و دڵگه‌شی و خه‌نده‌ى له‌ڕێی ده‌نگه خۆشه‌كه‌يه‌وه به‌خشيوه پێمان، ئومێدی لەشساغی و سەرفرازی و ته‌ندروستى باش بۆ هونەرمەند عومەر ڕەزا ده‌خوازم و یادی هەموو ئەو شاعير و هونەرمەنده كۆچكردووانەی گەلەكەمان بەگشتی بەخێر و ڕۆحیان شادبێت، گڵكۆكانيان غه‌ريقى ڕه‌حمه‌تى په‌روه‌ردگار بن.
گۆرانییەكانی هونەرمەند عومەر ڕەزا :
1/ هاتم هاتم / لە ئاواز و هەڵبەستی (ع ،ع، شەونم)
2/ پەڵپ و بیانووم پێ مەگرە / لە ئاواز و هەڵبەستی (ع ،ع، شەونم)
3/ لەیارەوە (دیاری) / ئاوازی هونه‌رمه‌ند نەجاتی عەبدە / هۆنراوەی ئەحمەد هەردی.
4/ گوڵاڵەی ژیان / ئاوازی ولیەم یوحەننا
5/ یاری چاوكاڵ / ئاوازی لەتیف حەمدی
6/ ئەڵێم وەك ساماڵ / ئاوازی لەتیف حەمدی
7/ بۆ تۆیە دڵ بۆتۆیە / لە ئاواز و هەڵبەستی شەماڵ سائیب
8/ تاكەی تاكەی / لە ئاواز و هەڵبەستی شەماڵ سائیب
ئه‌و چه‌ند وشه‌یه‌م ده‌رباره‌ی ژیان و كه‌سایه‌تی و كاره هونه‌رییه‌كانی هونه‌رمه‌ند عومه‌ر ڕه‌زا له ڕێكه‌وتی ( 13/4/2021) نووسیوه، به‌داخه‌وه دوای سێ مانگ و (24) ڕۆژ، واته له ڕێكه‌وتی (7/8/2021) به‌هۆی سه‌ختی نه‌خۆشییه درێژخایه‌نه‌كه‌یه‌وه، هونه‌رمه‌ند عومه‌ر ڕه‌زا ژیانئاوایی له خانه‌واده و بنه‌ماڵه و هونه‌ر و ئازیزانی ده‌كات، گرده‌كه‌ی سه‌یوانی سلێمانی بۆ هه‌میشه ده‌بێته دواهه‌واری، یادی به‌خێر و بۆ هه‌میشه ده‌نگه ئارام و ناسكه‌كه‌ی له‌یاده‌وه‌ریماندا به نه‌مری ده‌مێنێته‌وه.
جه‌مالی ده‌لاك (21/6/2024) هه‌ولێر.
سه‌رچاوه: (1و 2 و 3) بە سوپاسێکى زۆرەوە هەندێک لە زانیارییەکان سەبارەت بە هونەرمەند عومەر ڕەزا، لە هونەرمەندى ژەنیار مامۆستا عەلى حەمە ڕەزا براى هونەرمەند وەرگرتووە له‌ڕێكه‌وتی (5/8/2010) ئه‌ركى كێشا ئه‌و زانيارييانه‌ى له‌سه‌ر هونه‌رمه‌ند عومه‌ر ڕه‌زای برای پێ به‌خشيم، مامۆستا عه‌لى حه‌مه ڕه‌زا ئه‌ندامى دێرينى تيپى مۆسيقاى مه‌وله‌وى، هيواى ته‌ندروستى باش و ژيانێكى ئاراميى بۆ ده‌خوازم، بۆ خۆشم دووجار له‌نزیكه‌وه هه‌وڵم دا هونه‌رمه‌ند عومه‌ر ڕه‌زا بدوێنم، به‌داخه‌وه نه‌داری و پیری ڕێگه‌ی نه‌دا تا لاپه‌ڕه‌كانی ژیانی هه‌ڵبداته‌وه (دروود بۆ گیانی پاكی).
کۆمێنت (0)
تا ئێستا هیچ کۆمێنتێک نەکراوە.