ئەمڕۆ سێشەممە پێكهاتەی توركمانەكان لە شاری بەغدا سكاڵای یاساییان لە دادگای باڵای فیدڕالی تۆمار كرد، سكاڵاكەشیان لەسەر بڕیاری لابردنی كورسی كۆتاكان بوو لە هەڵبژاردنی داهاتووی پەرلەمانی كوردستان.
نووسینگەی راگەیاندنی وەزیری هەرێم بۆ كاروباری پێكهاتەكان بڵاوی كردەوە: سەرلەبەیانی ئەمڕۆ سێشەممە بڕوا عومەر بەرپرسی نووسینگەی ڕاگەیاندن و پەیوەندییەکانی وەزیری ھەرێم بۆ کاروباری پێکھاتەکان و بەرپرسی لقی ھەولێری ڕێکخراوی باڕش، بە مەبەستی داواکاری چەسپاندنی مافی پێکھاتەی نەتەوەی تورکمان و کورسییەکانیان لە پەرلەمانی کوردستان، کە بە سیستەمی کۆتا بەشداریی لە هەڵبژاردنەکانی داهاتووی پەرلەمانی هەرێمی کوردستان بکەن، لە دادگای باڵای ئیتیحادی بەغدا سکاڵای تۆمار کرد.
ئەمە لەكاتێكدایە كە دوێنێ دووشەمیش كریستیانەكان لە بەغدا لە رێگەی بریكارەكەیانەوە سكاڵای یاساییان لە دادگای باڵای فیدڕالی تۆمار كرد بۆ مەبەستی گەڕانەوەی كورسی كۆتاكان لە هەڵبژاردنی داهاتووی پەرلەمانی كوردستان.
دادگای باڵای فیدڕالی لە رۆژی 21ی شوباتی 2024 بڕیاری هەڵوەشاندنەوەی كورسی كۆتاكانی بۆ هەڵبژاردنی داهاتووی پەرلەمانی كوردستان دەركرد كە ژمارەیان 11 كورسی بوو، بەمەش ژمارەی كورسییەكانی پەرلەمانی كوردستان لە 111 كورسی بۆ 100 كورسی كەمكرایەوە.
جگە لەوەش دادگای باڵای فیدڕالی بڕیاری دا بۆ خولی شەشەمی هەڵبژاردنی پەرلەمانی كوردستان، هەرێمی كوردستان بەسەر چوار بازنەی هەڵبژاردن دابەش بكرێت.
ئەم بڕیارەی دادگای باڵای فیدڕالی بووە هۆی ناڕەزایەتی پێكهاتەكان و دواتریش حزب و لایەنە توركمان و كریستیانەكان بڕیاریان دا بەشداری هەڵبژاردنی داهاتووی پەرلەمانی كوردستان نەكەن.
کۆمێنت (0)
تا ئێستا هیچ کۆمێنتێک نەکراوە.