واده‌ی شه‌پۆڵێكی تری به‌فر و بارانبارین دیاری كرا

پسپۆڕێكی كه‌شوهه‌وا واده‌یه‌كی شه‌پۆڵێكی تری به‌فر و بارانبارینی له‌ ناوچه‌كانی هه‌رێمی كوردستان دیاری كرد و شه‌پۆڵه‌كه‌ش له‌ سه‌ره‌تای هه‌فته‌ی داهاتوو ده‌بێت.

ئاراس جه‌بار پسپۆڕی كه‌شوهه‌وا ڕایگه‌یاند: لە ئەنجامی نزمەپاڵەپەستۆیەکی باکوری ئەوروپا کە بە شێوەیەکی لاواز کاریگەری لەسەر ناوچەکانی ھەرێمی کوردستان دەبێت، لە بەرەبەیانی رۆژی ھەینی داهاتوو شەپۆلێکی بارانبارین بە رێژە و بڕی جیاواز ناوچەکانمان دەگرێتەوە.

ڕاشیگه‌یاند: کاریگەری شه‌پۆڵه‌كه‌ زیاتر لە سنووری پارێزگه‌ی دھۆک و ناوچە شاخاوییەکانی پارێزگه‌ی ھەولێر و ئیدارەی راپەرین دەبێت و بە بارانی بەردەوامی زستانەیی و بارینی بەفر لە چیا بەرزەکاندا، به‌ڵام شه‌پۆڵه‌كه‌ بە گشتی کاریگەری کەمتر دەبێت بۆ سەنتەری پارێزگای ھەولێر و ناوچە نزمەکان و سنووری پارێزگای سلێمانی و ھەڵەبجە بەرێژەیەکی مامناوەند و پچر پچر باران دەبارێت بە تایبەت لەئێوارەی ھەینی بۆ بەرەبەیانی رۆژی شەممە لەم ناوچانەدا بارانەکە دەست پێ دەکات.

هه‌روه‌ها ڕایگه‌یاند: لە ناوچەکانی پارێزگه‌ی کەرکووک و ئیدارەی گەرمیان بەگشتی شه‌پۆڵه‌كه‌ لاواز دەبێت و ناو بە ناو و ھەندێ کات نمەبارانی پچرپچر دەبارێت و پلەکانی گەرماش نزمبوونەوەی کەمی بەسەردا دێت بەتایبەت لە ناوچە شاخاوییەکاندا.

پسپۆڕه‌كه‌ی كه‌شوهه‌وا جه‌ختیشی كرده‌وه‌ كه‌ کاریگەری شەپۆڵه‌كه‌ لەسەر ناوچەکانی هه‌رێمی كوردستان بەرەبەیانی رۆژی شەممە کۆتایی پێ دێت.